Read this in English: Vegetarian recipe: Lentil patties with coriander

Servi dawn il-pulpetti ma’ zalza tat-tadam frisk, insalata jew bħala burger veġetarjan.

Ħin: siegħa u 10 minuti

Isservi: 4 persuni

Ingredjenti:

• 225 g għads aħdar jew kannella
• 400 g patata, imqaxxra u mqattgħa dadi
• Basla żgħira, imqattgħa rqiq
• 2 sinniet tewm, misħuqin
• Kuċċarina żerriegħa tal-kosbor, misħuqa
• 50 g frak tal-ħobż
• 100 ml żejt veġetali, biex taqli

Tħejjija:

1. Poġġi l-għads f’kazzola u għattih bl-ilma. Għallih għal madwar 35-45 minuta u saffih.
2. Fl-istess ħin għalli l-patata f’kazzola oħra sakemm tirtab, imbagħad saffiha, għaffiġha b’furketta u żidha mal-għads.
3. Sadanittant, saħħan mgħarfa żejt f’taġen u qalli l-basla u t-tewm, żid il-kosbor u kompli qalli għal minuta oħra. Żid din it-taħlita mal-patata u l-għads u ħawwad kollox flimkien.
4. Qassam it-taħlita fi tmienja biex tifforma l-pulpetti. Iksi kull pulpetta bil-frak tal-ħobż.
5. Saħħan iż-żejt f’taġen kbir fuq nar moderat u aqli l-pulpetti għal madwar żewġ minuti fuq kull naħa sakemm jiħmaru.

Ippruvajtha din ir-ricetta ta' pulpetti tal-għads bil-kosbor ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.