Għalkemm tadam insibu s-sena kollha, it-togħma u l-kulur tat-tadam fis-sajf ikunu fl-aqwa tagħhom u allura tajjeb li nużawh kemm nistgħu f’dan l-istaġun. Dawn il-pulpetti appetitużi fihom it-togħmiet Mediterranji biż-żieda tal-ħxejjex aromatiċi friski, li tistgħu tibdlu wkoll skont il-gosti tagħkom.
Ħin: siegħa u 15-il minuta
Isservi: 4 persuni
Ingredjenti:
- 4 tadamiet imdaqqsin
- 100 g ġobon feta
- Basla, maħkuka
- Mgħarfa tursin frisk, imqatta’ rqiq
- Mgħarfa ħabaq frisk, imqatta’ rqiq
- Mgħarfa origanu frisk, imqatta’; jew kuċċarina mnixxef
- 60 g dqiq
- Kuċċarina trab tal-ħami (baking powder)
- Melħ u bżar mitħun frisk
- Żejt taż-żebbuġa, biex taqli
Tħejjija:
- Aqsam it-tadam, neħħilu ż-żerriegħa u b’kuċċarina aqlagħlu l-laħam u qattgħu. Poġġih f’passtur, roxxu bi ftit melħ u ħallih joqtor għal 30 minuta.
- Fi skutella ħallat flimkien it-tadam, il-basla, it-tursin, il-ħabaq, u l-origanu, u farrak ukoll il-ġobon feta. Fi skutella oħra ħallat id-dqiq mat-trab tal-ħami.
- Żid it-taħlita tad-dqiq ma’ dik tat-tadam u ħawwadhom sewwa b’mgħarfa sakemm it-taħlita tkun xotta biżżejjed biex tifforma l-pulpetti. Jekk tkun għadha ratba żid ftit aktar dqiq. Poġġi t-taħlita fil-friġġ għal 30 minuta.
- Ferra’ biżżejjed żejt f’taġen kbir biex tiksi l-qiegħ u saħħnu sew. B’mgħarfa mxarrba poġġi mimli mgħarfa tat-taħlita fiż-żejt sakemm joqogħdu fit-taġen. Xarrab l-imgħarfa bejn waħda u oħra biex it-taħlita ma teħilx. Bl-imgħarfa stess agħtihom forma ta’ pulpetta u aqlihom għal 2-3 minuti fuq kull naħa sakem jiħmaru. Tellagħhom mit-taġen u poġġihom fi platt miksi bil-karti tal-kċina biex joqtru.
Ippruvajtha din ir-ricetta tal-pulpetti tat-tadam u ġobon feta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
