L-okra hija ħaxixa mhux tas-soltu fil-kċina Maltija, iżda komuni ħafna fl-Asja u fl-Afrika. F'Malta nsibuha f'Awwissu-Settembru, iżda nsibu wkoll tal-friża matul is-sena kollha fil-ħwienet tal-ikel Indjan. Meta ssajru jġib konsistenza mhux tas-soltu għax isir daqsxejn imtajjan imma din taqbel mar-riċetti li ssibu fih, barra li għandu togħma tajba u tajjeb ħafna għas-saħħa (saħansitra hemm min jgħid li jiġġieled il-kanċer). Ipprova din ir-riċetta tal-pulpetti tal-okra u ara x'jidhirlek.
Isservi: 4 persuni
Ħin: 30 minuta
Ingredjenti:
- 2 kikkri okra mqattgħa
- Nofs basla żgħira mqattgħa
- Melħ oħxon u bżar iswed mitħun
- 1/2 kikkra dqiq
- Bajda kbira
- 1/4 ta' kikkra xorrox tal-butir (buttermilk)
- 2 kikkri żejt Lesieur
Tħejjija:
- Saħħan iż-żejt ġo taġen kbir fuq nar medju.
- Ħawwad id-dqiq, nofs kuċċarina melħ u ponta bżar iswed ġo skutella, żid l-okra u l-basal u ħawwad.
- Ħabbat il-bajda u x-xorrox tal-butir ġo skutella oħra. Żid mat-taħlita u ħawwad.
- Aqli t-taħlita ftit ftit fiż-żejt sakemm tismar (madwar 4 minuti fuq kull naħa). Naqqas in-nar jekk qiegħda tismar wisq malajr.
- Nixxef fuq il-karta tal-kċina u servihom sħan.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
