Din ir-riċetta hija verżjoni veġetarjana tal-mousska li hija platt Grieg. Il-moussaka oriġinali għandha zalza bi kkapuljat taċ-ċanga jew ħaruf. Jekk tridha aktar mimlija tista’ tagħmel saff patata mqattgħa roti rqaq qabel tifrex iz-zalza tal-faqqiegħ. Din tgħin ukoll biex tixrob il-meraq żejjed.
Ħin: siegħa
Isservi: 8 persuni
Ingredjenti:
- 6 brunġiliet kbar
- Żejt taż-żebbuġa
- Butir biex tidlek
- 2 mgħaref frak tal-ħobż
Għaz-zalza:
- 700 g faqqiiegħ (mushrooms), imqattgħin
- Basla ħamra, imqattgħa rqiq
- 4 sinniet tewm, imqattgħin
- 60 ml inbid abjad
- 60 ml żejt taż-żebbuġa
- 400 g polpa tat-tadam
- ½ kuċċarina zokkor
- ½ kuċċarina trab tal-kannella (cinnamon)
- Melħ u bżar mitħun frisk
Għall-bexamell:
- 875 ml ħalib
- 100 g butir
- 100 g dqiq
- Niskata noċemuskata maħkuka
- Tliet isfra tal-bajd
- 150 g ġobon kefalotiri (tal-ħakk)
Tħejjija:
- Neħħi z-zokk u l-parti ta’ isfel tal-brunġiel u qattagħhom roti ta’ 1 ċm ħxuna. Roxx bil-melħ u ħallihom joqtru f’passatur għal 30 minuta. Laħlaħhom sew u xxuttahom. Idlikhom biż-żejt taż-żebbuġa u ixwihom fuq grilja miż-żewġ naħat. Tista’, minflok, tpoġġihom f’dixx fil-forn b’temperatura ta’ 200°C għal 20 minuta.
- Biex tagħmel iz-zalza tal-faqqiegħ: Saħħan iż-żejt taż-żebbuġa f’kazzola fuq nar moderat u żid il-basla. Qalli sakemm taqbad tirtab u żid it-tewm u l-faqqiegħ. Qalli sakemm jirtab u jinxtorob il-meraq tiegħu, imbagħad żid l-inbid u ħallih jevapora wkoll. Żid it-tadam, iz-zokkor u t-trab tal-kannella, niskata melħ u bżar mitħun frisk. Ħawwad u stenna sakemm iz-zalza tiftaħ tagħli, imbagħad baxxi n-nar u tektek sakemm tinġibed u teħxien.
- Biex tipprepara l-bexamell: Dewweb il-butir f’kazzola fuq nar moderat għal baxx. Żid id-dqiq u ħawwad kontinwament b’mgħarfa tal-injam sakemm it-taħlita tinġabar. Neħħi l-kazzola minn fuq in-nar u żid ftit mill-ħalib. Ħabbat tajjeb b’ħabbata tal-bajd sakemm it-taħlita tillixxa. Żid ftit ħalib ieħor u erġa’ ħabbat tajjeb. Ibqa’ żid il-ħalib sakemm it-taħlita ssir likwida mingħajr boċċi, imbagħad erġa’ poġġi l-kazzola fuq in-nar. Ibqa’ ħawwad sakemm it-taħlita tagħqad. Neħħi l-kazzola minn fuq in-nar u żid l-isfra tal-bajd, in-noċemuskata, 100 g mill-ġobon, melħ u bżar, u ħawwad kollox.
- Biex tgħaqqad il-moussaka: Saħħan il-forn għal temperatura ta’ 200°C. idlek dixx fond ta’ madwar 20 ċm x 30 ċm bil-butir u roxx bil-frak tal-ħobż. Poġġi nofs il-kwantità tal-brunġiel fil-qiegħ tad-dixx waħda tirkeb ftit lill-oħra. Ifrex iz-zalza tal-faqqiegħ u erġa’ poġġi saff brunġiel. Ferra’ l-bexamell fuq il-wiċċ kollu u ifrixha sat-truf. Roxx il-kumplament tal-ġobon u aħmi għal 30 minuta jew sakemm tara l-l-wiċċ ħmar sew.
- Ħalli l-moussaka toqgħod fil-forn stess għal mill-inqas 30 minuta qabel taqsamha u sserviha.
