L-għaġin, li tant nassoċawh mal-kċina Taljana, illum sar parti essenzjali tal-kċina Maltija wkoll. Għalkemm għandna vizzju nikluh bħala platt prinċipali minflok bħala prim, żgur li l-platt tal-għaġin se ssibu fuq il-mejda tal-ikel ta' kull familja, imqar darba jew darbtejn fil-ġimgħa. Meta naħsbu fir-riċetti tal-għaġin għall-Maltin, ġeneralment moħħna jmur fuq l-imqarrun, it-timpana jew ir-ravjul, iżda komunement insibu wkoll ħafna riċetti tipikament Taljani magħmulin b'mod awtentiku u tradizzjonali. Hawn se ssib riċetta tal-kannelloni mimlijin bil-brunġiel u bl-irkotta biex iżżid mal-platti tal-għaġin favoriti tiegħek.
Ħin: Siegħa
Isservi: 4-6 persuni
Ingredjenti:
- 18-il tubu tal-kannelloni lesti biex issajjarhom
- 500g bexamella lesta
- 200g zalza tat-tadam
- 200g irkotta
- 150g brunġiel
- 60g ġobon Parmiġġan
- 30g butir
- 20g frak tal-ħobż
- 2 bajdiet
- Ħabaq
- Żejt taż-żebbuġa
- Noċemuskata
- Melħ u bżar mitħun frisk
Tħejjija:
- Saħħan il-forn għal temperatura ta' 180°C.
- Qaxxar il-brunġiel u qattgħu dadi żgħar.
- Saħħan mgħarfa żejt taż-żebbuġa f'taġen u qalli l-brunġiel sakemm jibda jirtab. Żid melħ u bżar mitħun frisk. Qatta' l-weraq tal-ħabaq b'idejk u żidu wkoll.
- Neħħi minn fuq in-nar u żid l-irkotta, il-bajd, il-ġobon u l-frak tal-ħobż. Ħawwad kollox sew flimkien.
- Imla t-tubi bit-taħlita.
- Idlek dixx kwadru bil-butir. Merraq il-bexamella bi ftit ħalib u żidha ftit noċemuskata. Ifrex nofsha fil-qiegħ tad-dixx.
- Poġġi l-kannelloni mimlijin fid-dixx wieħed ħdejn l-ieħor, u fuqhom ifrex il-kumplament tal-bexamella u z-zalza tat-tadam.
- Għatti d-dixx b'biċċa foil u aħmi għal 40 minuta; ikxfu nofs sajran. Servi sħun.