Blalen tal-brunġiel mimlijin bil-ġobon scamorza jew mozzarella, jew ġobon ieħor tal-gosti tiegħek li jinħall. Jekk trid tevita ż-żejt u l-qali tista’ taħmi dawn il-blalen tal-brunġiel ukoll – saħħan il-forn għal temperatura ta’ 180°C, poġġi l-blalen fuq tilar miksi bil-kartaforn u aħmihom sakemm jiħmaru.
Ħin: 40 minuta
Kwantità: 12
Ingredjenti:
- 600 g brunġiel, imqaxxar u mqatta’ dadi żgħar
- 100 g ħobż xott, mingħajr qoxra u mqatta’ dadi
- 100 g ġobon kefatoliri (tal-ħakk)
- 50 g ġobon scamorza jew mozzarella, imqattgħa fi 12-il dada
- 2 bajdiet, imħabbtin ħafif
- Żejt veġetali, biex taqli
- Frak tal-ħobż
- 2 mgħaref tursin frisk, imqatta’
- Melħ u bżar mitħun frisk
Tħejjija:
- Għalli borma bl-ilma bil-melħ u żid il-brunġiel. Ħallih jagħli għal 5 minuti, imbagħad saffih u ħallih joqtor fil-passatur filwaqt li tagħfsu ftit biex tneħħi kemm tista’ mill-ilma.
- Poġġi l-brunġiel fi blender u itħan sakemm isir purè. Poġġi l-brunġiel fi skutella u żid il-bajd u l-ġobon kefatoliri. Farrak id-dadi tal-ħobż xott fil-blender ukoll u zidu mal-brunġiel. Żid it-tursin, melħ u bżar u ħawwad kollox sew.
- Ifforma t-taħlita fi 12-il ballun u, b’subgħak, agħmel ħofra fin-nofs ta’ kull wieħed. Imla l-ħofra b’biċċa ġobon scamorza jew mozzarella u erġa’ agħlaq il-ballun tal-bruġiel madwar il-ġobon.
- Ferrex il-frak tal-ħobż fuq platt u dawwar il-blalen fih sakemm jinksew.
- Saħħan biżżejjed żejt f’kazzola fonda u niżżel bil-mod il-blalen (ftit ftit) bi xkumatur fiż-żejt. Aqli sakemm jiħmaru sew, imbagħad tellagħhom u poġġihom fuq platt miksi bil-karti tal-kċina biex joqtru.
- Servi bħala l-ewwel platt ma’ insalata, bħala kontorn, jew għal waqt xi festin.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
