Din hija riċetta ta’ stuffat aktar ħafif bit-togħma friska tal-lumi adattata għall-ġranet sħan ta’ dan l-istaġun.
Ħin: siegħa u 45 minuta
Isservi: 4 persuni
Ingredjenti:
- 1 kg spalla tal-majjal imqattgħa biċċiet kbar
- 4 mgħaref dqiq
- Mgħarfa paprika
- 3 mgħaref żejt taż-żebbuġa
- mgħarfa klin frisk (rosemary), imqatta’
- 2 werqiet tar-rand
- 4 sinniet tewm
- Basla kbira, imqattgħa rqiq
- 200 ml inbid abjad
- 200 ml stokk tat-tiġieġ, jaħraq
- Qoxra sħiħa ta’ lumija
- Meraq ta’ lumija
- Melħ u bżar mitħun frisk
- Patata maxx, biex isservi
Tħejjija:
- Fi skutella ħallat flimkien id-dqiq, il-paprika, melħ u bżar. Żid il-biċċiet tal-majjal u dawwarhom sew sakemm jinksew.
- Saħħan iż-żejt f’kazzola u aqli l-biċċiet tal-majjal sakemm jieħdu l-kulur minn kull naħa. Żid il-basla u qalli għal minuta filwaqt li tobrox mill-qiegħ b’mgħarfa tal-injam, imbagħad żid ukoll it-tewm, il-klin u r-rand u kompli qalli għal minuta oħra. Ferra’ l-inbid fil-kazzola u ħalli kollox jiftaħ jagħli. Ferra’ wkoll l-istokk, itfa’ l-qoxra tal-lumija u ħawwad, baxxi n-nar u tektek għal madwar siegħa. Jekk tara li l-likwidu nġibed iżżejjed żid ftit misħun.
- Ħalli l-istuffat joqgħod għal 15-il minuta qabel isservih, imbagħad tella’ l-qoxra tal-lumija, żid il-meraq tal-lumi, ħawwad u servi mal-patata maxx.
