Read this in English: Recipe: Beef olive stew
Il-braġjoli wkoll huma wieħed mill-platti tradizzjonali tagħna l-Maltin. Tiltaqa’ ma’ riċetti tal-braġjoli differenti; min jimliehom bil-bajd sħiħ mgħolli, min iżid ukoll il-perżut, min jagħmilhom stuffat u min isajjarhom fil-forn ukoll. Għal din ir-riċetta tista’ żżid ukoll mgħarfa sultana maz-zalza qabel iżżida mal-braġjoli; jiena nippreferi l-istuffat mingħajr is-sultana, imma nagħtikom parir biex ma taqbżux il-qxur taċ-ċitru għax jagħmel differenza kbira fit-togħma.
Ħin: sagħtejn u 15-il minuta
Isservi: 4 persuni
Ingredjenti:
Għall- braġjoli:
- 4 dawriet kbar laħam taċ-ċanga, madwar 500 g b’kollox
- 500 g ikkapuljat tal-majjal
- 2 bajdiet, imħabbtin ħafif
- 2 mgħaref ġobon kefalotiri (tal-ħakk), maħkuk
- 2 mgħaref tursin frisk, imqatta’ rqiq
- 2 sinniet tewm, imqattgħin irqiq
- ½ kuċċarina curry
- Melħ u bżar mitħun frisk
- 2 mgħaref żejt veġetali
Għall-istuffat:
- 2 basliet kbar, imqattgħin irqiq
- 4 sinniet tewm, imqattgħin
- 200 g piżelli tal-friża; tista’ tuċa wkoll friska
- 3 mgħaref kunserva
- 200 ml inbid aħmar
- 300 ml stokk taċ-ċanga
- Qxur tal-lumi , larinġ u mandolin, madwar 5 ċm kull waħda, imqattgħin irqiq
- 2 werqiet tar-rand
- ¼ kuċċarina curry
- ¼ kuċċarina ħwawar imħalltin (mixed spice
- ¼ kuċċarina msiemer tal-qronfol (cloves) mitħunin
- ¼ kuċċarina trab tal-kannella (cinnamon)
- Niskata noċemuskata maħkuka friska
- Melħ u bżar mitħun frisk
Tħejjija:
- Biex tipprepara l-braġjoli: Fi skutella ħallat flimkien l-ikkapuljat, il-bajd, il-ġobon, it-tursin, it-tewm u l-curry, u melħ u bżar kemm tiggosta. Ifrex il-biċċiet taċ-ċanga ċatti u aqsam it-taħlita tal-majjal bejniethom. Ifrex it-taħlita mingħajr ma tasal sat-truf, imbagħad ilwi l-ġnub ’il ġewwa u gerbeb iċ-ċanga b’kollox f’romblu. Agħlaq sew kull romblu b’toothpick. Saħħan iż-żejt f’taġen kbir fuq nar moderat u xawwat il-braġjoli mad-dawra kollha. Poġġi l-braġjoli f’kazzola baxxa.
- Biex tagħmel iz-zalza għall-istuffat: Fl-istess taġen żid il-basal u qalli sakemm isir trasparenti, imbagħad żid it-tewm u qalli għal 2 minuti oħra. Żid il-kunseva u ħawwad għal 2 minuti, imbagħad ferra’ l-inbid. Ħalli l-inbid jinġibed ftit u żid l-istokk u l-piżelli. Kif it-taħlita tibda tagħli żid il-ħwawar kollha, melħ u bżar kemm tiggosta, u l-qxur taċ-ċitru wkoll. Poġġi l-weraq tar-rand fuq il-braġjoli, imbagħad ferra’ z-zalza fuq kollox fil-kazzola. Il-braġjoli għandhom ikunu mgħarrqa fiz-zalza.
- Għatti l-kazzola u poġġiha fuq nar moderat sakemm l-istuffat jiftaħ jagħli, imbagħad baxxi n-nar għal bati u ħallih itektek għal bejn siegħa u kwart u siegħa u nofs. Kull tant ħin ċaqlaq ftit il-braġjoli mill-qiegħ u dawwarhom biex ma jeħlux. Jekk tara li z-zalza qed tixxotta wisq żidha ftit misħun, u jekk nofs sajran tkun immerrqa żżejjed ħalli l-għatu tal-kazzola imbexxaq.
- Ħalli l-istuffat joqgħod għal 15-il minuta, imbagħad servih maċ-chips jew ħobż tal-Malti frisk.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
