Dan l-istuffat stil Grieg (stifado) jisserva l-aktar mal-għaġin tal-bajd jew għaġin forma ta’ xgħir. Meta tkun ippruvajt din ir-riċetta u għoġbuk it-togħmiet qawwijin tagħha, tista’ tippruvaha bil-vitella jew bil-fenek minflok biċ-ċanga.
Ingredjenti
Għal 4 persuni
- 5kg ċanga bħall-biċċa ta’ fuq tal-koxxa, imqatta’ f’biċċiet ta’ 7ċm
- 4 mgħaref żejt taż-żebbuġa ekstra verġni
- 20 basla, żgħar ħafna (bħal tal-pikles), imqaxxrin u mħollijin sħaħ
- 4 tadamiet misjurin, imqaxxrin u mqattgħin, jew bott ta’ 400g polpa tat-tadam
- 1 mgħarfa kunserva
- Melħ oħxon
- Bżar mitħun frisk
- Għaġin u ġobon iebes bħal kefalotiri, pecorino u Parmiġġan, biex isservi
Għall-immarinar
- 3 sinniet tewm, imqattgħin
- 2-3 werqiet tar-rand
- 1 ½ żerriegħa tal-allspice
- 6 imsiemer tal-qronfol sħaħ
- 1 bastun tal-kannella
- 1 kuċċarina origanu
- 125ml inbid aħmar
- 4 mgħaref ħall tal-inbid aħmar
Metodu
- Poġġi ċ-ċanga f’bieqja tal-ħġieġ u itfa’ l-ingredjenti tal-immarinar magħha. Ħawwad u poġġi fill-friġġ għal 6 sigħat jew tul il-lejl.
- Saħħan iż-żejt taż-żebbuġa f’taġen kbir fuq nar medju u qalli l-basal għal 5 minuti sakemm jibda jirtab. Tella’ l-basal min ġot-taġen b’mgħarfa mtaqqba u warrbu.
- Saffi ċ-ċanga mill-immarinar u erfa’ l-immarinar. Sajjar iċ-ċanga fl-istess taġen għal madwar 8-10 minuti jew sakemm tieħu l-kulur minn kull naħa. Erġa’ itfa’ l-basal u żid it-taħlita tal-immarinar. Żid ukoll it-tadam, il-kunserva u biżżejjed ilma biex tgħatti l-istuffat.
- Roxx bil-melħ u l-bżar. Ħalli t-taħlita tiftaħ tagħli, għatti u tektek għal 1½-2, jew sakemm issir tarja ċ-ċanga u z-zalza tinġibed u tagħqad.
- Servi mal-għagin u bil-ġobon maħkuk.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
