Riċetta tradizzjonali: Stuffat tal-qarnita

Riċetta: Stuffat tal-qarnita

L-istuffat tal-qarnita huwa meqjus bħala platt u riċetta Maltija. Fis-swieq u fil-ħwienet tal-ħut madwar Malta huwa faċli li ssib tixtri l-qaqrnit. Biex tkun ċerta li naddaft il-qarnita sew, aħjar tgħid lill-bejjiegħ biex inaddafielek. Darba bejjiegħ tal-ħut tagħni parir li l-aħjar mod biex il-qarnita ma tibqax iebsa hu li tiffriżaha għal ftit jiem qabel issajjarha. Dan il-parir sibtu siewi ħafna u llum il-ġurnata naħseb ftit jiem qabel meta niddeċiedi li se nsajjar il-qarnita.

Din ir-riċetta bnina tista’ sserviha b’modi differenti: tista’ tużaha bħala zalza fuq l-ispagetti; tista’ żżid 500g patata maqsuma f’erba’ meta tkun tfajt l-ingredjenti l-oħra kollha u qabel ttekktek l-istuffat għall-aħħar darba; jew isservih ma’ ħobża tal-Malti friska u tqarmeċ.

Ingredjenti

Għal 4 persuni

  • 800g qarnita, imnaddfa u maħsula
  • 2 mgħaref żejt taż-żebbuġa
  • 3 basliet, imqattgħin
  • 4 sinniet tewm, imqatta’
  • 2 mgħaref kunserva
  • 3 tadamiet, imnaddfin u mqattgħin dadi żgħar
  • 1 mgħarfa nagħniegħ frisk, imqatta’
  • 2 mgħaref tursin frisk, imqatta’
  • Bżar mitħun frisk
  • Qoxra maħkuka ta’ nofs larinġa
  • Qoxra maħkuka ta nofs lumija
  • 1 werqa rand

Ikollok bżonn ukoll

  • Qoxra u meraq ta’ nofs lumija
  • 1 werqa rand

Poġġi l-qarnita ffriżata f’kazzola bl-ilma fuq in-nar. Żid il-meraq u qoxra ta’ nofs lumija u l-werqa tar-rand. Meta tiftaħ tagħli, tektek għal 30 minuta  fuq nar bati. Itfi n-nar u ħalli l-qarnita tibred fl-istess ilma. Oħroġha mill-ilma u qattagħha bicciet.

Saħħan iż-żejt f’taġen kbir jew borma ċatta u qalli l-basal għal 3 minuti, imbagħad żid it-tewm u kompli tektek għal 2 minuti oħra. Żid il-kunserva, imbagħgad it-tadam, l-inbid u l-qarnita. Ħalli t-taħlita tiftaħ tagħli u żid iż-żebbuġ, in-nagħniegħ u t-tursin, il-qxur maħkuk tal-lumi u larinġ, il-werqa tar-rand, u bżar mitħun frisk. Jekk se titfa’ l-patata mal-istuffat issa huwa l-ħin li żżidha. Għatti parzjalment u tektek għal 30-40 minuta, jew sakemm tara li z-zalza qed tinxtorob.