It-Taljani jħobbu jħalltu u jieklu l-bettieħ mal-prosciutto. Din hija riċetta ħafifa li tista’ tagħmel bħala appetizer għal qabel xi BBQ. Tista’ tibdel jew tħallat il-bettieħ u tuża d-dulliegħ ukoll.
Ħin: 30 minuta, u ħin għall-immarinar
Kwantità: 24
Ingredjenti:
- Bukkett ħabaq frisk
- 2 mgħaref ħall balsamiku
- 2 mgħaref żejt taż-żebbuġa
- Melħ u bżar mitħun frisk
- 6 listi prosciutto
- Kilo bettieħ mill-oranġjo (cantaloupe) jew dulliegħ
- 300 g blalen żgħar tal-mozzarella friska (madwar 25 imqattrin mil-likwidu)
- Stikek tal-bamboo qosra
Tħejjija:
- Aqta’ 25 werqa tal-ħabaq minn maz-zkuk u warrabhom. Qatta’ rqiq daqs mgħarfa oħra weraq tal-ħabaq u ħalltu maż-żejt taż-żebbuġa, il-ħall balsamiku, u melħ u bżar fi skutella. Poġġi l-blalen tal-mozzarella fit-taħlita u dawwarhom biex jinksew; għattihom u ħallihom jimmarinaw għal siegħa fil-friġġ.
- B’melon baller aqta’ 25 ballun mill-bettieħ; tista’ wkoll tqattgħu dadi daqs ta’ gidma jekk trid.
- Aqta’ l-prosciutto fi strixxi – kull lista aqtagħha f’erbgħa biex ikollok 24. Gerbeb kull strixxa f’romblu żgħir.
- Fuq kull stikka domm biċċa bettieħa, biċċa prosciutto, werqa tal-ħabaq mitwija, u fl-aħħar ballun mozzarella.
