Ingredjenti Mediterranji li flimkien jagħmlu ikla apettituża u bnina, speċjalment jekk isservi dan il-platt ma’ ħobż frisk Malti.
Ħin: siegħa
Isservi: 4 persuni
Ingredjenti:
- 2 brunġiliet, imqattgħin listi ta’ 0.5 ċm għat-tul
- Żejt taż-żebbuġa
- Melħ u bżar mitħun frisk
Għall-mili:
- 150 g irkotta
- 150 g mozzarella friska
- Niskata noċemuskata maħkuka
Għaz-zalza:
- 2 mgħaref żejt taż-żebbuġa
- 500 g tadam, imqaxxar, imnaddaf u mqatta’
- Basla, imqattgħa rqiq
- 4 sinniet tewm, imqattgħin
- Melħ u bżar mitħun frisk
- Ponn weraq tal-ħabaq frisk
Tħejjija:
- Idlek il-listi tal-brunġiel biż-żejt miż-żewġ naħat u roxxhom bil-melħ u l-bżar. Saħħan grilja u ixwi l-brunġiel miż-żewġ naħat sakemm jieħu l-kulur. Poġġihom fuq platt miksi bil-karti tal-kċina.
- Farrak il-mozzarella u ħallatha fi skutella mal-irkotta u n-noċemuskata. Poġġi daqs ta’ kuċċarina taħlita fuq kull lista tal-brunġiel u gerbibhom biex tagħlaq il-mili fin-nofs. Poġġihom fuq platt bix-xifer il-miftuħ ’l isfel.
- Saħħan il-forn għal temperatura ta’ 180°C.
- Saħħan iż-żejt taż-żebbuġa f’taġen kbir u żid il-basla u t-tewm, qalli sakemm jirtabu, imbagħad żid it-tadam. Żid melħ u bżar mitħun frisk kemm tiggosta u tektek għal 15-il minuta. Fl-aħħar żid il-ħabaq ukoll.
- Ferra’ nofs iz-zalza f’dixx tal-forn u poġġi l-milwiet tal-brunġiel fuqha. Kompli ferrex il-kumplament taz-zalza fuq il-brunġiel. Aħmi għal 20 minuta.
- Servi l-milwiet tal-brunġiel ma’ insalata jew ħobż frisk.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
