Riċetta: Pizza bil-basal, ġbejniet u prosciutto

Pizza with onions, gbejniet and prosciutto

Kultant aktar ma pizza tkun sempliċi aktar tkun tajba, speċjalment jekk il-ftit ingredjenti li tuża jkollhom togħmiet bnini bħal ta’ din ir-riċetta. Iz-zalza hija differenti għax magħmula minn tadam frisk, basal u tewm, u tadam imqadded li jagħti togħma sajfija u Mediterranja lil din il-pizza.

Ħin: siegħa

Kwantità: 2 pizez

Ingredjenti:

Għaz-zalza:

  • 2 mgħaref żejt taż-żebbuġa
  • Basla, imqattgħa rqiq
  • 4 sinniet tewm, imqattgħin irqiq
  • 6-8 tadamiet, imqaxxrin, imnaddfin u mqattgħin
  • 100 g tadam imqadded, imqatta’ rqiq
  • Mgħarfa kunserva
  • ½ kuċċarina zokkor
  • Mgħarfa origanu mnixxef
  • Melħ u bżar mitħun frisk

Għall-wiċċ:

  • 2 basliet ħomor, imqattgħin flieli rqaq
  • 2 mgħaref żejt taż-żebbuġa
  • 6-8 listi prosciutto, imqattgħin
  • 200 g gbejniet bojod imnixxfin, imqattgħin irqiq jew imfarrkin
  • Melħ u bżar mitħun frisk

 

Tħejjija:

  1. Saħħan il-forn għal temperatura ta’ 230°C.
  2. Idlek tilar jew tnejn bi ftit żejt, iftaħ l-għaġina f’żewġ crieki ta’ madwar 28 ċm l-wieħed u poġġihom fuq it-tilar/i.
  3. Poġġi l-flieli tal-basal f’dixx żgħir, żid iż-żewġ mgħaref żejt taż-żebbuġa u ftit bżar u melħ, u ħawwad kollox. Daħħal il-basal fil-forn għal 10-15-il minuta.
  4. Sadanittant ipprepara z-zalza: Saħħan iż-żejt f’kazzola u qalli l-basla sakemm tirtab. Żid it-tewm u t-tadam imqadded, il-kunserva u z-zokkor u kompli qalli għal 2 minuti oħra. Żid it-tadam frisk, l-origanu, u melħ u bżar u għaffeġ b’mgħarfa tal-injam biex tkisser sew it-tadam. Għatti l-kazzola parzjalment u tektek għal 10 minuti filwaqt li tħawwad kultant. Jekk ikun hemm bżonn zidha ftit ilma.
  5. Qassam iz-zalza bejn iż-żewġ ċrieki tal-għaġina u ifrixha mal-wiċċ. Ferrex il-biċċiet tal-prosciutto fil-wiċċ, u ferrex fuqhom il-flieli tal-basal u l-ġbejniet.
  6. Aħmi għal 15-20 minuta jew sakemm tara li l-għaġina ħmaret.

Ippruvajtha din ir-riċetta ta' pizza bil-basal, ġbejniet u prosciutto? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jogħġbuk.

Would you like to read this recipe in English? Let us know in the comments section below!