Riċetta: Sidra tat-tiġieġ mimlijin bl-ispinaċi u l-panċetta

Stuffed chicken breasts

Meta timla s-sidra tat-tiġieġ tkun qed tgħin biex il-laħam ma jixxuttax u t-togħmiet tal-mili jiġu assorbiti mil-laħam stess. F’din ir-riċetta tista’ tuża spinaċi tal-friża minflok friska, bil-friża mniżżla u magħsura.

Ħin: 50 minuta

Isservi: 4 persuni

Ingredjenti:

  • 4 isdra tat-tiġieġ kbar, bil-ġilda
  • 200 g weraq tal-spinaċi
  • 2 mgħaref żejt taż-żebbuġa
  • 100 g panċetta, imqattgħa
  • Basla, imqattgħa rqiq
  • 200 g ġobon mascarpone
  • 30 g ġobon Parmiġġan, maħkuk
  • Melħ u bżar mitħun frisk

 

Tħejjija:

  1. Saħħan il-forn għal temperatura ta’ 200°C. Idlek dixx bi ftit żejt
  2. Agħmel qasma fuq il-ġenb ta’ kull sider tat-tiġieġ biex tifforma but.
  3. Poġġi l-ispinaċi f’passatur u ferra’ fuqha ilma jagħli mill-kitla biex titbiel. Laħlaħha taħt l-ilma kiesaħ, agħsarha u qattagħha.
  4. Saħħan mgħarfa miż-żejt taż-żebbuġa f’taġen fuq nar moderat. Qalli l-panċetta sakemm tibda tiħmar, imbagħad żid il-basla u qalli sakemm tirtab.
  5. Neħħi t-taġen minn fuq in-nar, żid l-ispinaċi, il-ġobon Parmiġġan u l-mascarpone, melħ u bżar, u ħawwad.
  6. Imla l-isdra tat-tiġieġ bit-taħlita u agħlaq il-fetħa bl-istikkadenti.
  7. Poġġi l-isdra mimlijin fid-dixx  u idlikhom bil-kumplament taż-żejt. Roxxhom bil-melħ u l-bżar u aħmihom għal 20-30 minuta jew sakemm tara li saru sew u ħadu kulur ħamrani.

Ippruvajtha din ir-ricetti ta' sidra tat-tiġieġ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know by commenting below and we'll have it translated for you!