Read in English: Recipe: Turkey breasts stuffed with walnuts and cranberries
Din ir-riċetta hija ideali għal dawk li kienu qatgħu qalbhom li jsajru dundjan sħiħ, għax tikkonsisti minn sider id-dundjan mimli. Il-mili huwa tassew interessanti wkoll - bil-frott u l-ġewż - u żgur li dan il-platt se jżid il-ferħ mal-mejda tal-ikel.
Ingredjenti
Għal 16-il persuni
Għall-mili:
- 60g butir
- 2 basliet imdaqqsin, imqattgħin irqiq
- 4 kikkri frak tal-ħobż frisk
- ½ kikkra cranberries imnixxfin
- ½ kikkra berquq imnixxef, imqatta’ rqiq
- ¼ kikkra ġewż imqaxxar, imqatta’ rqiq
- ¼ kikkra weraq tas-salvja (sage) friska, imqattgħin irqaq
- Melħ u bżar mitħun frisk
Għas-sider tad-dundjan:
- 7kg sider tad-dundjan mingħajr għadam u bil-ġilda
- 5 kikkri stokk tat-tiġieġ
- ⅓ kikkra żejt taż-żebbuġa
- ⅓ kikkra dqiq
- 2 friegħi sagħtar
- 1 bajda, imħabbta ħafif
Metodu
- Biex tipprepara l-mili: Dewweb il-butir f’taġen fuq nar moderat. Żid il-basal u qalli għal 10 minuti sakemm jirtab. Poġġi l-basal f’bieqja.
- Mal-basal żid il-frak tal-ħobż, il-cranberries, il-berquq, il-ġewż, is-salvja u l-bajda. Roxx bil-melħ u l-bżar u ħallat kollox flimkien.
- Biex timla s-sider tad-dundjan: Saħħan il-forn għal temperatura ta’ 170°C. Poġġi s-sider tad-dundjan fuq board bil-ġilda ’l isfel u n-naħa ppuntata tħares lejk. Ibda minn fejn jiltaqgħu iż-żewġ isdra u b’sikkina taqta’ aqsam għan-naħa ta’ barra mingħajr ma tkompli taqsam sax-xifer. Iftaħ il-parti maqtugħa ’l barra (bħal farfett) u rrepeti l-istess proċedura fuq in-naħa l-oħra.
- Ifrex il-mili fuq is-sider miftuħ. Erġa’ agħlaq il-biċċiet tas-sider li tkun ftaħt biex tagħlaq il-mili ġewwa. Orbot u ssikka s-sider bl-ispag.
- Ferra’ kikkra stokk f’dixx fond. Poġġi d-dundjan bil-ġilda ’l fuq u idilku b’kuċċarina żejt. Roxx bil-melħ u l-bżar.
- Ixwi għal siegħa u 40 minuta, jew sakemm il-meraq li joħroġ minnu, meta ttaqqbu fl-eħxen parti, joħroġ ċar. Waqt li jkun qed isir xarrbu bil-likwidu tad-dixx stess. Neħħi d-dundjan mid-dixx u għattih bil-foil. Ħallih f’post għas-sħana għal 15-il minuta.
- Sadanittant saffi l-likwidu tad-dixx. Saħħan il-kumplament taż-żejt fit-taġen fuq nar għoli u żid id-dqiq. Ħawwad għal 3 minuti sakemm id-dqiq jibda jiħmar. Ferra l-likwidu li tkun ġbart mid-dixx u ħabbat. Bil-mod żid ukoll l-istokk. Żid is-salvja u, meta l-istokk jibda jagħli, baxxi n-nar u ħallih ibaqbaq għal 12-15-il minuta sakemm it-taħlita tibda tagħqad. Servi l-gravy mas-sider tad-dundjan mimli.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.