Jekk fil-friża żżomm ftit isdra tat-tiġieġ, tista’ toħloq riċetta bihom u b’ingredjenti li jkollok id-dar għax huma versatili immens. Barra minn hekk tista’ timla l-isdra ħin qabel ikollok bżonnhom u tkompli bir-riċetta wara biex tiffranka l-ħin.

Ħin: siegħa u 15-il minuta

Isservi: 4 persuni

Ingredjenti:

Għall-mili:

• 2 imgħaref żejt taż-żebbuġa
• Basla kbira, imqattgħa rqiq
• 2 sinniet tewm, misħuqin
• 225 g weraq tal-ispinaċi, imqatta’
• 60 ml inbid abjad
• 100 g ġbejniet bojod imnixxfin, imfarrkin
• Melħ u bżar mitħun frisk

Għat-tiġieġa:

• 4 isdra tat-tiġieġ, mingħajr ġilda u għadam (madwar 200-250 g il-waħda)
• 2 bajdiet
• 100 g dqiq
• 100 g frak tal-ħobż
• Melħ u bżar mitħun frisk
• 200 ml żejt taż-żebbuġa

Tħejjija:

1. Il-mili:
   1. Saħħan iż-żejt taż-żebbuġa f’taġen kbir fuq nar moderat.
   2. Żid il-basla u t-tewm u qalli sakemm il-basla tirtab.
   3. Żid l-inbid u kif jibda jbaqbaq żid ukoll l-ispinaċi.
   4. Qalleb sakemm tidbiel l-ispinaċi u jevapora l-likwidu.
   5. Neħħi t-taġen minn fuq in-nar u żid il-ġbejniet, niskata melħ u bżar.
   6. Ħalli t-taħlita tibred.
2. Biex timla’ l-isdra:
   1. Aqla’ l-flett ta’ kull sider u warrbu, u neħħi xi xaħam li jista’ jkollhom.
   2. Aqta’ but fin-naħa l-aktar ħoxna ta’ kull sider mingħajr ma ttaqqab naħat oħra.
   3. Imla kull sider bi kwart tal-mili ppreparat u ifirxu mal-but kollu.
   4. Agħfas it-truf flimkien biex tagħlaq (tista’ tuża toothpick biex tagħmel dan).
3. Poġġi 3 platti fondi ħdejn xulxin. Fl-ewwel wieħed poġġi d-dqiq; fit-tieni ħabbat  il-bajd; u fit-tielet ħallat il-frak tal-ħobż ma’ niskata melħ u bżar mitħun frisk.
4. Roxx l-isdra tat-tiġieġ bil-melħ u l-bżar minn kull naħa. Wieħed wieħed dawwarhom fid-dqiq u farfar iż-żejjed; imbagħad billhom fil-bajd sakemm jinksew u qattar iż-żejjed; u fl-aħħar dawwarhom kompletament sakemm jinksew fil-frak tal-ħobż.
5. Kessaħhom fil-friġġ għal mill-inqas 15-il minuta.
6. Sadanittant saħħan il-forn għal temperatura ta’ 180°C.
7. Saħħan iż-żejt f’taġen kbir fuq nar moderat għal għoli. Bil-mod poġġi tnejn mill-isdra fit-taġen u aqlihom għal madwar 3 minuti fuq kull naħa sakemm jiħmaru. Poġġihom ġo dixx u agħmel l-istess bit-tnejn l-oħra.
8. Aħmi għal 20-25 minuta, sakemm isiru sew minn ġewwa.
9. Servi fil-pront ma’ patata mixwija, ħaxix mgħolli jew insalata.

Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.