Riċetta tradizzjonali: Ross il-forn

Read this recipe in English: Traditional Maltese recipe: Baked rice

Għalkemm platti u riċetti ġodda niltaqgħu magħhom ta’ kuljum minn kull rokna tad-dinja, ir-riċetti tradizzjonali Maltin għadhom fost l-aktar favoriti mal-Maltin u l-Għawdxin. Din ir-riċetta ta’ ross il-forn hija l-verżjoni l-ħafifa fejn issajjar ir-ross direttament fil-forn minflok tgħallih qabel. Jiena nħobb inżid ukoll il-qarabagħli kemm biex ir-ross ma jixxuttax u kemm biex inkun qed indaħħal aktar ħaxix.

Ħin: siegħa u 15-il minuta

Isservi: 6 persuni

Ingredjenti:

Għaz-zalza:

  • 2 imgħaref żejt veġetali
  • 2 basliet, imqattgħin irqiq
  • 4 sinniet tewm, imqattgħin irqiq
  • 2 qarabagħliet, imqattgħin dadi żgħar
  • 400 g ikkapuljat taċ-ċanga
  • Bott żgħir corned beef
  • 2 imgħaref kunserva
  • 200 ml passata tat-tadam
  • Mgħarfa Worchestershire sauce
  • Dada tat-tiġieġ
  • 200 ml ilma
  • Bżar mitħun frisk
  • Kuċċarina curry

Għar-ross:

  • 400 g Tilda Easy Cook rice
  • 3 bajdiet, imħabbtin ħafif
  • 700 ml ilma
  • 350 ml ħalib
  • 100 g ġobon kefalotiri (tal-ħakk), maħkuk

 Tħejjija:

  1. Saħħan il-forn għal temperatura ta’ 200°C.
  2. Saħħan iż-żejt f’taġen kbir jew kazzola fuq nar moderat.
  3. Żid il-basal u t-tewm u qalli sakemm il-basla ssir trasparenti.
  4. Żid il-qarabagħli u kompli qalli sakemm jibda tirtab.
  5. Żid l-ikkapuljat u ħawwad sakemm jieħu l-kulur.
  6. Imbagħad żid il-curry u l-kunserva u kompli ħawwad għal 2 minuti oħra.
  7. Żid il-passata tat-tadam, il-200 ml ilma, il-Worchestershire sauce, id-dada u bżar.
  8. Ħalli z-zalza tiftaħ tagħli, baxxi n-nar u ħalliha ttektek għal 15-il minuta, parzjalment mgħottija, filwaqt li tħawwadha kultant ħin.
  9. Poġġi l-corned beef f’nofs iz-zalza u, kif jibda jisħon u jirtab, kissru b’mgħarfa tal-injam u ħawwad sakemm jitħallat fiz-zalza.
  10. Sakemm tkun qed ittektek iz-zalza, f’dixx tal-forn bil-ġnub għoljin, ħallat flimkien il-bajd u l-ħalib, l-ilma, il-ġobon maħkuk u t-Tilda Easy Cook rice. Żid iz-zalza fid-dixx ukoll u ħawwad kollox mill-qiegħ sew.
  11. Aħmi għal 15-il minuta, imbagħad oħroġ id-dixx mill-forn u erġa’ ħawwad ir-ross biex iz-zalza ma tinżilx fil-qiegħ. Daħħal ir-ross fil-forn u kompli aħmi għal 25-30 minuta oħra, sakemm ir-ross jagħqad u l-wiċċ jiħmar.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.