Riċetta: Torta tal-frott frisk

Fresh fruit pie

Din it-torta arrraenti tieħu ftit tal-ħin biex tipprepara u l-aħjar li tittiekel dakinhar stess, però tista’ tipprepara u taħmi l-qoxra tal-għaġina kif ukoll tagħmel il-krema ġurnata qabel, imbagħad tgħaqqad it-torta fil-ġurnata li tkun se sserviha.

Ħin: siegħa; u ħin biex tkessaħ u tberred

Isservi: 6-8 persuni

Ingredjenti:

Għal-għaġina:

  • 200 g dqiq, mgħarbul
  • Niskata melħ
  • 110 g butir, temperatura tal-kamra
  • 50 g zokkor fin (caster sugar)
  • Bajda, imħabbta ħafif

Għall-krema:

  • 300 ml ħalib
  • 3 isfra tal-bajd
  • 50 g zokkor fin (caster sugar)
  • 2 mgħaref dqiq
  • 2 mgħaref dqiq tat-qamħirrun (corn flour)
  • Kuċċarina brandy
  • ½ kuċċarina essenza tal-vanilla

Għall-wiċċ:

  • Madwar 700 g frott imħallat bħal frawli, kiwi, banana, ħawħ, għeneb, eċċ.
  • 125 g ġamm tal-berquq
  • Mgħarfa ilma

 

Tħejjija:

  1. B’ħabbata tal-elettriku ħabbat flimkien il-butir u z-zokkor sakemm ikollok taħlita ċara u ħafifa. Żid il-bajda u ħabbat sakemm titħallat, imbagħad żid id-dqiq sakemm it-taħlita tifforma ballun. Iċċattja ftit il-ballun tal-għaġina, gerbibha fil-cling film u poġġiha fil-friża għal 10 minuti.
  2. Idlek u roxx bid-dqiq turtiera bil-qiegħ jinqala’ ta’ 23 ċm. Poġġi l-għaġina fin-nofs tat-turtiera u b’idejk iċċattjaha biex tiftaha mal-qiegħ u ttellagħha mal-ġnub tat-turtiera. Għatti bil-cling film u daħħal it-turtiera fil-friża għal 15-il minuta.
  3. Saħħan il-forn għal temperatura ta’ 200°C.
  4. Taqqab il-qiegħ tal-għaġina bil-ponot ta’ furketta u aħmiha għal 5 minuti. Baxxi t-temperatura tal-forn għal 180°C u kompli aħmi għal 15-il minuta oħra jew sakemm l-għaġina tixxotta u tibda tieħu l-kulur. Oħroġha mill-forn u ħalliha tibred kompletament qabel timliha.
  5. Biex tagħmel it-taħlita tal-mili: Fi skutella ħabbat l-isfar tal-bajd b’ħabbata tal-bajd, żid iz-zokkor u l-melħ u kompli ħabbat, imbagħad għarbel fuqhom id-dqiq u d-dqiq tal-qamħirrun u kompli ħabbat sew. Poġġi l-ħalib f’kazzola fuq nar moderat u eżatt kif jibda jagħli ferrgħu bil-mod fit-taħlita tal-bajd filwaqt li tkompli tħabbat. Erġa’ ferra t-taħlita fil-kazzola u poġġiha fuq nar medju filwaqt li tkompli tħabbat, biex ma jiffurmawx boċċi, għal madwar minuta jew sakemm tagħqad u ssir krema. Aqleb il-krema fi skutella, żid l-essenza tal-vanilla u l-brandy u ħallat kollox sew. Għattiha bil-cling film u ħalliha tibred.
  6. Sadanittant ipprepara l-frott billi tqaxxru, tnaddfu u tqattgħu skont il-bżonn. Biex tagħmel il-glaze tal-wiċċ saħħan il-ġamm u l-ilma f’kazzola żgħira sakemm isiru likwidu, imbagħad għaddi minn passatur irqiq biex tneħħi xi biċċiet li jkun fadal.
  7. Biex tgħaqqad it-torta: Idlek il-qiegħ u l-ġnub tal-għaġina bi ftit glaze u ħalliha tinxef għal 15-il minuta biex tipprevieni li l-għaġina tixxarrab bil-mili. Ifrex u llixxa l-krema fuq l-għaġina. Irranġa l-frott fuq il-wiċċ tal-krema. Erġa’ saħħan il-glaze u iżbogħ il-frott ħafif biha.

Ippruvajtha din ir-ricetta tat-torta tal-frott frisk? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!