Riċetta: Tonn frisk mixwi, b’zalza ta’ tadam imqadded, kappar u żebbuġ

Tuna steak

It-tonn huwa ħuta li tinqabad ħafna fil-Mediterran u popolari fostna l-Maltin speċjalment imsajra fiz-zalza tat-tadam kappar u żebbuġ. Din ir-riċetta hija ftit differenti għalkemm ħafna mill-ingredjenti huma l-istess.

Ħin: 30 minuta

Isservi: 4 persuni

Ingredjenti:

  • Żejt taż-żebbuġa
  • 4 dawriet tonn maqtugħin fi ħxuna ta’ 2 ċm (madwar 200 g kull biċċa)
  • Kuċċarina melħ oħxon

Għaz-zalza:

  • 75 g tadam imqadded, imqatta’ rqiq
  • 50 g żebbuġ iswed mingħajr għadma, imqatta’ rqiq
  • Mgħarfa kappar, imqatta’
  • 75 ml żejt taż-żebbuġa
  • Meraq ta’ nofs lumija
  • Mgħarfa basal imqatta’ rqiq ħafna
  • Mgħarfa tursin frisk, imqatta’
  • Bżar mitħun frisk

 

Tħejjija:

  1. Biex tipprepara z-zalza: Ħallat l-ingredjenti kollha fi skutella.
  2. Idlek il-biċċiet tat-tonn minn kull naħa biż-żejt taż-żebbuġa u roxx bil-melħ u l-bżar u ħallihom joqogħdu sakem issaħħan grilja jew BBQ. Ixwi t-tonn miżżewġ naħat għal madwar 4 minuti, imbagħad aqlibhom u kompli ixwi għal 2-4 minuti oħra jew sakem isiru għall-gosti tiegħek. It-tonn l-aħjar li ma’ jissajjarx iżżejjed għax jinxef.
  3. Servi fil-pront maz-zalza ppreparata.

Ippruvajtha din ir-ricetta ta' tonn frisk mixwi, b’zalza ta’ tadam imqadded, kappar u żebbuġ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.