Ritratt: Flickr/ cathou_cathare
Hawn min togħġbu l-patata msajra fl-istess dixx mal-ħut u hawn min le. F’din ir-riċetta l-ħut huwa msajjar fil-forn, imma l-istess riċetta tista’ faċilment tiġi msajra f’kazzola baxxa u wiesgħa fuq in-nar, jiġifieri bħal fil-forn.
Ħin: siegħa
Isservi: 4 persuni
Ingredjenti:
- 4 spnottiet (jew porzjon għal kull persuna), imnaddfin
- 800 g patata mdaqqsa, maħsula
- 150 g żebbuġ iswed
- 4 sinniet tewm, imqattgħin
- Ponn tursin frisk, imqatta’
- Mgħarfa nagħniegħ frisk, imqatta’
- Mgħarfa merqtux frisk, imqatta’
- 4 mgħaref żejt taż-żebbuġa
- Lumija mqattgħa roti rqaq
- 300 ml inbid abjad
Tħejjija:
- Saħħan il-forn għal temperatura ta’ 200°C.
- Poġġi l-patata f’kazzola u għattiha bl-ilma. Poġġiha fuq nar moderat u, meta tiftaħ tagħli, għalli għal 8-10 minuti. Saffiha, ħalliha tibred ftit u qattagħha roti.
- Fi skutella kbira ħallat il-patata ma’ 2 mgħaref miż-żejt taż-żebbuġa, iż-żebbuġ, nofs it-tursin, it-tewm, melħ u bżar. Ferrex din it-taħlita f’dixx tal-forn.
- Poġġi l-ħut fuq il-patata. Ferrex ir-roti tal-lumi fuq il-wiċċ tagħhom u roxx fuqhom il-kumplament taż-żejt. Roxx ukoll il-kumplament tat-tursin, in-nagħniegħ u l-merqtux, melħ u bżar.
- Aħmi għal 15-il minuta, imbagħad żid l-inbid u kompli aħmi għal 15-il minuta oħra sakemm isir il-ħut.
