Għal riċetta eleganti tal-ħut ipprova din tal-merluzz b’qoxra ta’ lewż fuq sodda ta’ spinaċi. Minflok merluzz tista’ tuża ħut abjad ieħor, anke dak li nsibu ppakkjat fil-friża tas-supermarket.
Ħin: 25 minuta
Isservi: 4 persuni
Ingredjenti:
- ½ kikkra lewż, imfarrak
- Qoxra maħkuka ta’ lumija
- Meraq ta’ lumija
- Mgħarfa merqtux (marjoram) frisk, imqatta’
- 2 mgħaref żejt taż-żebbuġa
- Kuċċarina melħ oħxon
- Bżar mitħun frisk
- 4 porzjonijiet flett tal-merluzz, madwar 700 g b’kollox
- 4 kuċċarini mustarda Dijon
- 2 sinniet tewm, imqatta’
- 500 g weraq tal-ispinaċi tari
- Flieli tal-lumi, biex iżżejjen
Tħejjija:
- Saħħan il-forn għal temperatura ta’ 200°C. Idlek dixx tal-forn biż-żejt.
- Fi skutella żgħira ħallat flimkien il-lewż, il-qoxra tal-lumija, il-merqtux, mgħarfa miż-żejt, nofs kuċċarina mill-melħ, u bżar.
- Poġġi l-ħut ċatt fid-dixx u idlek kull biċċa b’kuċċrina mustarda. Aqsam it-taħlita tal-lewż bejn il-porzjonijiet u ppressaha fil-mustarda.
- Aħmi l-ħut fil-forn għal 8-9 minuti; is-sajran jiddependi mill-ħxuna tal-ħut.
- Sadanittant saħħan mgħarfa żejt taż-żebbuġa f’kazzola fuq nar moderat. Żid it-tewm u ħawwad għal 30 sekonda.
- Żid l-ispinaċi, il-meraq tal-lumi, in-nofs kuċċarina melħ li jkun fadal kif ukoll ftit bżar mitħun frisk u ħawwad għal 2-4 minuti sakemm jidbiel l-ispinaċi.
- Servi l-ħut fuq l-ispinaċi bil-flieli tal-lumi mal-ġenb.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
