Il-fwied hawn min iħobbu ħafna u hawn min ma jħarisx lejh. Il-fwied tal-fenek għandu togħma partikolari u differenti mill-fwied tat-tiġieġ, majjal jew ċanga – aktar artab u fin fil-palat.
Ħin: 30 minuta
Isservi: 4 persuni
Ingredjenti:
- 350 g ross arborio jew short grain
- 2 fwied tal-fenek, imqattgħin biċċiet żgħar
- Litru stokk tal-ħaxix jew tat-tiġieġ, jaħraq
- Basla, imqattgħa rqiq
- 2 sinniet tewm, imqattgħin
- 200 ml inbid abjad
- Mgħarfa butir
- Mgħarfa żejt taż-żebbuġa
- Melħ u bżar mitħun frisk
- Ġobon Parmiġġan, maħkuk, biex isservi
Tħejjija:
- Saħħan iż-żejt f’taġen kbir u fond u qalli l-basla u t-tewm sakemm jirtabu, imbagħad żid il-fwied u kompli qalli sakemm jieħu l-kulur.
- Żid ir-ross u ħawwad sakemm jinkesa, imbagħad żid l-inbid u ħawwad sakemm jinxtorob. Żid kuċċarun stokk u kompli ħawwad sakemm jinxtorob mir-ross ukoll. Kompli żid l-istokk ftit ftit sakemm isir ir-ross. Neħħi r-ross minn fuq in-nar, roxx bil-melħ u l-bżar u ħawwad, imbagħad żid il-butir u ħawwad sakemm jinħall.
- Servi fil-pront bil-ġobon Parmiġġan imraxxax fil-wiċċ.
