Il-fenek huwa wieħed mill-aktar platti favoriti u tradizzjonali tagħna. Inħobbu nsajruh ħafna moqli biz-zalza tat-tadam frisk, speċjalment fix-xhur tas-sajf. Din hija riċetta simili imma aktar imħawra u msajra aktar fit-tul fil-forn biex il-laħam isir aktar tari u jinqala’ minn mal-għadma aħjar.
Ħin: sagħtejn
Isservi: 4 persuni
Ingredjenti:
- Fenek sħiħ ( 1.7 kg), imqatta’
- 2 mgħaref dqiq imħalltin bi ftit melħ u bżar
- 60 ml żejt taż-żebbuġa
- 2 basliet, imqattgħin
- 6 sinniet tewm, imqattgħin
- 100 g panċetta, imqattgħa
- Kuċċarina żerriegħa tal-bużbież
- Kuċċarina klin (rosemary), imqatta’
- 2 mgħaref tursin frisk, imqatta’
- 250 ml inbid aħmar
- 2 mgħaref ħall balsamiku
- 2 bottijiet (400 g X 2) polpa tat-tadam, jew ekkwivalenti f’tadam imqaxar u mqatta’
Tħejjija:
- Saħħan il-forn għal temperatura ta’ 180°C.
- Dawwar il-biċċiet tal-fenek fid-dqiq u farfar iż-żejjed. Saħħan 2 mgħaref żejt f’taġen kbir u aqli l-fenek minn kull naħa sakemm jibda jiħmar. Poġġi l-fenek f’dixx tal-forn.
- Fl-istess taġen saħħan il-kumplament taż-żejt u qalli l-basal, it-tewm, il-panċetta u l-bużbież sakemm jirtab u jibda jieħu l-kulur il-basal. Żid l-inbid u l-ħall balsamiku u tektek sakemm il-likwidu jinxtorob bin-nofs. Żid il-polpa jew it-tadam, u l-klin, u kif jiftaħ jagħli tektek għal ftit minuti (jekk se tuża tadam frisk stenna sakemm jinħall sew it-tadam u għaffġu b’furketta waqt li jkun qed isir).
- Ferra’ z-zalza fuq il-fenek fid-dixx u daħħlu fil-forn għal bejn siegħa u siegħa u kwart. Qalleb darba f’nofs is-sajran
- Servi l-fenek biz-zalza u bit-tursin imferrex fuqu ma’ ħobż frisk bil-qoxra.