Porzjonijiet b’ingredjenti sempliċi li ssib dejjem fil-kċina tiegħek. B’bażi ta’ gallettina u wiċċ tal-ġewż tal-indi flimkien mat-togħma tal-ġamm jagħmlu ħelu attraenti u bnin.
Ħin: siegħa u nofs
Kwantità: 20
Ingredjenti:
- 250 g dqiq
- 225 g zokkor fin (caster sugar)
- 125 g butir
- 3 bajdiet
- ½ kuċċarina essenza tal-vanilla
- 200 g ġewż tal-indi mnixxef (dessicated coconut)
- 250 g ġamm taċ-ċirasa, jew frawli, rasberries, eċċ.
Tħejjija:
- Saħħan il-forn għal temperatura ta’ 180°C. Idlek dixx ta’ 24 ċm x 30 ċm, b’għoli ta’ 3 ċm, bil-butin u iksih bil-kartaforn.
- Għarbel id-dqiq fi skutella, żid il-butir u daħħlu fid-dqiq bil-ponot ta’ subgħajk (rub in) sakemm isir qisu frak tal-ħobż, imbagħad żid nofs iz-zokkor u ħawwad sew. Ħabbat bajda waħda mal-essenza tal-vanilla, żidhom mat-taħlita u għaqqadhom sakemm tiffoma għaġina.
- Ippressa l-għaġina fil-qiegħ tad-dixx u aħmi għal 15-20 minuta jew sakemm tiħmar. Titfix il-forn.
- Ifrex il-ġamm fuq l-għaġina sħuna.
- Ħabbat iż-żewġ bajdiet man-nofs zokkor li fadal. Żid il-ġewż tal-indi u ħawwad. Ifrex it-taħlita fuq il-ġamm fid-dixx u kompli aħmi għal madwar 25 minuta oħra jew sakemm tiħmar.
- Kessaħ kompletament fid-dixx stess, qatta’ f’porzjonijiet u servi.
