Fis-sezzjoni tal-ħaxix ta’ ħafna mis-supermarkets, kif ukoll fis-swieq u l-ħwienet tal-ħaxix, illum issib tixtri frott differenti biex tuża ma’ ħelu jew ikel, jew biex iżżejjen ir-riċetta tiegħek bih. Jekk ma ssibx tixtri berries friski, tista’ tuża tal-friża – niżżlilhom il-friża u ħallihom joqtru f’passatur qabel tużahom.
Ħin: 40 minuta
Kwantità: 12
Ingredjenti:
- 250 g dqiq, mgħarbul
- Kuċċarina trab tal-ħami (baking powder)
- ½ kuċċarina trab tal-kannella (cinnamon)
- 125 g zokkor ismar
- 175 g butir kiesaħ, imqatta’ dadi
- Qoxra maħkuka ta’ lumija
- 50 g lewż pur mitħun
- Bajda
- 400 g berries imħalltin
- 50 g ġellewż, imkisser
- 50 g lewż, imkisser
- 50 g ħafur (oats)
Tħejjija:
- Saħħan il-forn għal temperatura ta’ 200°C. Iksi dixx baxx ta’ 18 ċm x 28 ċm bil-kartaforn.
- Poġġi d-dqiq, it-trab tal-ħami u l-butir fi skutella u daħħal il-butir fid-dqiq bil-ponot ta’ subgħajk (rub in).
- Żid iz-zokkor, il-qoxra tal-lumija maħkuka u l-lewż mitħun u ħawwad kollox sew.
- Neħħi 150 g mit-taħlita u warrbu għal aktar tard; mal-kumplament żid il-bajda u ħawwad sew.
- Ifrex it-taħlita bil-bajd fid-dixx u agħfasha mal-qiegħ b’wara ta’ mgħarfa. Ifrex il-berries fid-dixx ukoll.
- Mat-taħlita li tkun warrabt żid il-lewż u ġellewż imfarrak, il-ħafur u t-trab tal-kannella. Ħallat sew u ferrex fuq il-berries.
- Agħfas u ċċattja ftit it-taħlita b’mgħarfa. Aħmi għal 35 minuta.
- Ħalliha tiksaħ fid-dixx stess. Qassam f’porzjonijiet u servi.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
