Il-karawett ftit mielaħ f'din ir-riċetta jagħti togħma sorprendenti mal-ħlewwa tal-caramel u ċ-ċikkulata.
Il-bott tal-caramel illum issib tixtrih lest. Minflok, jiena npoġġi 4 bottijiet ħalib magħqud f’kazzola wiesgħa, ngħattihom bl-ilma u npoġġihom fuq nar għoli sakemm jagħli l-ilma, imbagħad inħallihom itektku fuq nar bati għal sagħtejn u nofs, u meta jibirdu npoġġihom fil-friġġ għal meta niġi bżonnhom għal ħelu ieħor bħall-banoffee pie.
Preparazzjoni: 10 minuti
Ħin totali: 30 minuta
Ingredjenti:
- 200 g ċikkulata tal-ħalib
- 100 g zokkor fin (caster sugar)
- 200 g butir, temperatura tal-kamra
- 300 g dqiq self-raising, mgħarbul
- Bott ta’ 400 g caramel, jew ħalib magħqud mgħolli
- 125 g karawett immellaħ, imkisser
Tħejjija:
- Saħħan il-forn għal temperatura ta’ 180°C. Iksi dixx baxx ta’ 20 ċm x 30 ċm bil-kartaforn.
- Poġġi d-dqiq u l-butir fi skutella u daħħal il-butir fid-dqiq bil-ponot ta’ subgħajk (rubbing in) sakemm isiru bħal frak tal-ħobż. Żid iz-zokkor u ħallat sew.
- Aqleb it-taħlita fid-dixx ippreparat. Agħfas ftit it-taħlita bil-pala ta’ idek biex tifrixha sew mal-qiegħ kollu.
- Aħmi għal 10 minuti jew sakemm tkun ħmaret kollha. Oħroġha mill-forn u ħalliha tibred fid-dixx stess.
- Ifrex il-karamel mal-wiċċ tal-għaġina kollu, ferrex il-karawett u ppressah ftit ’l isfel fil-caramel b’mgħarfa.
- Dewweb iċ-ċikkulata banjumarija. Ferra’ ugwalment fuq il-caramel u kompli ifirxu biex tiksi l-wiċċ kompletament.
- Kessaħ fil-friġġ għal sagħtejn. Qatta’ fi 12-il biċċa fid-dixx stess u servi.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!