Minflok il-butir dawn il-muffins fihom il-yoghurt. Meta taqsam waħda min-nofs issib il-marmellata li tagħmel kuntrast bit-togħma ftit morra mal-ħlewwa tal-muffin.
Ħin: 30 minuta
Kwantità: 8-10
Ingredjenti:
- 175 g dqiq
- 25 g ħafur (oats)
- 175 g zokkor ismar
- Kuċċarina trab tal-ħami (baking powder)
- ½ kuċċarina bikarbonat tas-sodju (bicarbonate of soda)
- Qoxra maħkuka u meraq ta’ larinġa
- Mgħarfa żejt veġetali
- 150 ml yoghurt naturali
- Bajda
- 5 mgħaref marmellata
Tħejjija:
- Saħħan il-forn għal temperatura ta 200°C. Iksi landa tal-muffins b’10 forom tal-karti.
- Għarbel id-dqiq, il-bikarbonat tas-sodju u t-trab tal-ħami fi skutella u ħallat tajjeb magħhom il-ħafur u z-zokkor.
- Fi skutella oħra ħabbat flimkien il-bajda, iz-zejt, il-yoghurt, il-meraq u l-qoxra tal-larinġa. Ferra’ t-taħlita likwida f’dik xotta u għaqqad kollox billi tħawwad b’furketta.
- Poġġi mgħarfa mit-taħlita f’kull forma, imbagħad poġġi kuċċarina marmellata wkoll. Qassam il-kumplament tat-taħlita bejn il-forom.
- Aħmi għal 15-20 minuta jew sakemm jiħmaru.