L-għaġina tal-pizza hija l-eħfef għaġina li tista’ tagħmel. Għalkemm faċilment tixtriha lesta jew iffriżata, l-aħjar riżultat tal-pizza huwa dak bl-għaġina friska. Fil- friġġ iżżomm għal jumejn jew tlieta.
Ħin: 15-il minuta
Kwantità: 500 g għaġina; biżżejjed għal żewġ pizez
Ingredjenti:
- 300 g dqiq plain
- 2 kuċċarini ħmira niexfa
- Kuċċarina zokkor
- Kuċċarina melħ fin
- Mgħarfa żejt taż-żebbuġa
- 185 ml ilma fietel
Tħejjija:
- Għarbel id-dqiq f’bieqja kbira. Żid il-ħmira, iz-zokkor u l-melħ u ħawwadhom sew.
- Ħallat flimkien iż-żejt u l-ilma u ferragħhom fin-nofs tad-dqiq. Għaqqad l-ingredjenti kollha b’mgħarfa.
- Roxx il-mejda bid-dqiq u tella’ t-taħlita fuqu. Aħdem l-għaġina sakemm tiġi lixxa u tiġġebbed. Idlek bieqja biż-żejt u poġġi l-għaġina fiha. Għattiha b’sarvetta nadifa jew bil-cling film u ħalliha titla’ għal siegħa, jew sakemm tirdoppja fid-daqs, f’post sħun.
- Erġa’ għaġinha għal minuta qabel tiftaħha kif ikollok bżonn.
Nota: meta tiftaħ l-għaġina ħalliha titla’ għal 15-il minuta qabel taħmiha.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
