Din hija l-iktar għaġina faċli li tista’ tagħmel.
Biex ikollok riżultat tajjeb għandek iżżomm f’moħħok dawn il-punti:
- żomm l-ingredjenti u r-reċipjenti kemm jista’ jkun kesħin; għarbel id-dqiq;
- aħdem kemm jista’ jkun malajr biex ma ssaħħanx l-għaġina b’idejk;
- dejjem geżwer l-għaġina fil-clingfilm u kessaħha qabel tużaha;
- iftaħ l-għaġina fuq wiċċ kiesaħ bħal irħam, u roxx il-wiċċ u l-lenbuba bi ftit dqiq;
- qabel iddaħħal l-għaġina fil-forn erġa’ kessaħha biex tevita li din tinġibed u tiċkien waqt il-ħami;
- biex l-għaġina ssir mill-qiegħ sewwa poġġi t-turtiera fuq tilar imsaħħan qabel iddaħħalha fil-forn.
Ħin: 15-il minuta
Kwantità: 300 g għaġina
Ingredjenti:
- 200 g dqiq, mgħarbul
- Niskata (pinch) melħ
- 110 g butir, imqatta’ dadi; jew taħlita ta’ butir u xaħam
- 2-3 mgħaref ilma kiesaħ
Tħejjija:
Bl-idejn:
- Poġġi d-dqiq, il-melħ u l-butir f’bieqja.
- Daħħal il-butir fid-dqiq billi taħdmu bil-ponot ta’ subgħajk sakemm isir bħal frak tal-ħobż.
- Żid l-ilma u b’sikkina ħallat kollox flimkien sakem l-ingredjenti jagħqdu u jiffurmaw ballun. Jekk it-taħlita tibqa’ xotta żid aktar ilma – kuċċarina kull darba.
- Roxx il-mejda bi ftit dqiq, tella’ l-għaġina u aħdimha ftit kemm tagħqad. Geżwer l-għaġina fil-clingfilm u poġġiha fil-friġġ għal tal-inqas 20 minuta qabel tużaha.
Bil-proċessur tal-ikel:
- Poġġi d-dqiq, il-melħ u l-butir fil-bieqja tal-proċessur.
- Ħawwad l-ingredjenti bil-pulse sakemm isiru bħar frak tal-ħobż. Oqgħod attenta li ma tħawwadx iżżejjed.
- Minn ġol-lenbut tal-għatu ferra’ l-ilma bil-mod u ħawwad sakemm l-ingredjenti jingħaqdu f’ballun.
- Geżwer l-għaġina fil-clingfilm u kessaħha fil-friġġ għal mill-inqas 20 minuta qabel tużaha.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
