Il-mustarda hija l-akkumpanjament perfett għal mal-majjal u ż-żerriegħa sħiħa tagħmel togħma u tagħti dehra sabiħa fl-istess ħin. Dawn il-kustilji tal-majjal jistgħu jiġu mmarinati anke mill-jum ta’ qabel u huma ideali jekk ikollok ftit ħin u ħafna nies x’titma.
Ħin: siegħa u 10 minuti, u ħin għall-immarinar
Isservi: 6 persuni
Ingredjenti:
- 6 kustilji tal-majjal bi ħxuna ta’ 2 ċm
- 2 mgħaref żejt taż-żebbuġa
- 2 mgħaref żerriegħa tal-mustarda (wholegrain mustard)
- 2 mgħaref ħall balsamiku
- Mgħarfa klin
- Melħ u bżar mitħun frisk
Tħejjija:
- Fi skutella ħallat flimkien iż-żejt taż-żebbuġa, il-mustarda, il-ħall balsamiku, il-klin, melħ u bżar. Poġġi l-kustilji f’dixx tal-ħġieġ li jidħol fil-forn u ferra’ t-taħlita fuqhom. Dawwar il-kustilji sew biex jinksew. Għatti d-dixx u ħallihom jimmarinaw għal mill-inqas 20 minuta. Tista’ tipprepara l-kustilji b’dan il-mod u tħallihom jimmarinaw anke tul il-lejl.
- Oħroġ il-kustilji mill-friġġ. Saħħan il-forn għal temperatura ta’ 200°C.
- Aħmi l-kustilji mikxufin għal siegħa jew sakemm isiru sew. Aqlibhom darba tul is-sajran.
