Għalkemm f’din ir-riċetta l-patata u l-majjal huma msajrin flimkien fil-forn, it-taħlitiet tal-immarinar u l-ewwel fażi tas-sajran huma separati, u għalhekk kemm il-patata u kemm il-laħam iżommu t-togħmiet oriġinali tagħhom.

Ħin: siegħa u nofs, u siegħa għall-immarinar

Isservi: 4 persuni

Ingredjenti:

• 4 kustilji tal-majjal, bl-għadma, madwar 2.5 ċm ħxuna
• 8 patatiet imdaqqsin, maħsulin sew u mqattgħin flieli
• Flieli tal-lumi u tursin imqatta’, biex isservi

Għall-immarinar: 

• 80 ml żejt taż-żebbuġa
• Mgħarfa ħall tal-inbid aħmar
• 2 sinniet tewm, misħuqin
• 2 basliet ħomor, imqattgħin
• Kuċċarina origanu mnixxef
• Kuċċarina mustarda
• Melħ u bżar mitħun frisk

Għall-patata:

• 60 ml inbid abjad
• 2 sinniet tewm, misħuqin
• Meraq ta’ nofs lumija
• 2 imgħaref żejt taż-żebbuġa
• Kuċċarina origanu mnixxef
• Melħ u bżar mitħun frisk

Tħejjija:

1. Fi skutella ħallat flimkiem iż-żejt taż-żebbuġa, il-ħall, 2 sinniet tewm, il-basal, l-origanu, il-mustarda, melħ u bżar.
2. Dawwar il-kustilji fit-taħlita tal-immarinar u poġġihom fi platt fond.
3. Ferra’ l-kumplament tat-taħlita fuq il-kustilji, għatti l-platt u daħħlu fil-friġġ għal mill-inqas siegħa.
4. Saħħan il-forn għal temperatura ta’ 180°C. Iksi tilar bil-kartaforn.
5. Fi skutella kbira ħallat flimkien l-inbid, 2 sinniet tewm, il-meraq tal-lumi, 2 mgħaref żejt taż-żebbuġa, il-kuċċarina origanu, melħ u bżar mitħun frisk.
6. Żid il-patata u dawwarha sewwa sakemm tinkesa bit-taħlita.
7. Poġġi l-flieli tal-patata ħdejn xulxin fuq it-tilar u roxx fuqhom il-kumplament tat-taħlita, għattihom b’biċċa kartaforn oħra u aħmihom għal 45 minuta.
8. Sadanittant, saħħan grilja fuq nar għoli u ixwi l-kustilji għal ftit minuti fuq kull naħa sakemm jieħdu l-kulur.
9. Neħħi l-kartaforn minn fuq il-patata u poġġi l-kustilji fuqhom f’saff wieħed.
10. Erġa’ għatti kollox bil-kartaforn u kompli aħmi għal madwar 30 minuta oħra jew sakemm il-kustilji jsiru sew.
11. Itfi l-forn u ħalli kollox joqgħod għal 10 minuti.
12. Servi l-patata u l-kustilji bit-tursin fil-wiċċ u felli lumi ma’ kull porzjon.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!