Ġwienaħ immarinati f’taħlita taħraq, servuti ma’ dip tal-yoghurt bil-lumi biex tibbilanċja t-togħmiet.

Ħin: siegħa u 15-il minuta, u ħin għall-immarinar

Isservi: 4-6 persuni

Ingredjenti:

• 1½ kg ġwienaħ tat-tiġieġ
• Kuċċarina curry jaħraq
• ½ kuċċarina turmerik
• Mgħarfa soy sauce
• 2 mgħaref żejt veġetali
• 2 sinniet tewm, misħuqin
• Melħ u bżar mitħun frisk

Għad-dip:

• 200 ml yoghurt Grieg
• 2 mgħaref mayonnaise
• Meraq ta’ nofs lumija
• Mgħarfa tursin frisk, imqatta’ rqiq

Tħejjija: 

1. Aqta’ barra l-ponot tal-ġwienaħ u aqsamhom min-nofs (mill-ġog).
2. Fi skutella kbira ħallat flimkien iż-żejt, is-soy sauce, il-curry, it-turmerik, it-tewm, melħ u bżar. Żid il-ġwienaħ u dawwarhom fit-taħlita sakemm jinksew. Għatti l-iskutella u poġġiha fil-friġġ għal mill-inqas siegħa jew tul il-lejl.
3. Sadanittant ipprepara d-dip. Fi skutella ħabbat flimkien il-yoghurt, il-mayonnaise, il-meraq tal-lumi u t-tursin. Għatti l-iskutella u poġġiha fil-friġġ għal iktar tard.
4. Oħroġ il-ġwienaħ immarinati mill-friġġ u saħħan il-forn għal temperatura ta’ 200°C. Iksi tilar bil-foil u poġġi gradilja fuq il-foil.
5. Poġġi l-ġwienaħ fuq il-gradilja mingħajr ma jmissu ma’ xulxin u daħħalhom fil-forn għal 20 minuta. Aqleb il-ġwienaħ fuq il-wiċċ l-ieħor u kompli sajjar għal 20-25 minuta oħra.
6. Servi l-ġwienaħ sħan mad-dip tal-yoghurt.

Ippruvajtha din ir-ricetta ta' ġwienaħ tat-tiġieġ bil-curry, b’dip tal-yoghurt? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.