L-ikel stil Ċiniż huwa popolari mal-Maltin, imma kultant naqtgħu qalbna li nippreparawh id-dar minħabba l-ingredjenti li trid tuża fih. Din ir-riċetta hija ħafifa ħafna biex tipprepara u l-ingredjenti huma komuni u li ssib f’kull kċina.
Ħin: 35 minuta, u ħin għall-immarinar
Isservi: 4 persuni
Ingredjenti:
- 1 kg ċanga, imqatta’ listi ta’ 0.5 ċm
- Mgħarfa soy sauce , u kuċċarina oħra
- Kuċċarina curry
- Kuċċarina ġinġer mitħun
- Kuċċarina bikarbonat tas-sodju (bicarbonate of soda)
- Kuċċarina zokkor, u ½ kuċċarina oħra
- 2 mgħaref sherry
- 3 mgħaref żejt veġetali
- 2 basliet, imqattgħin flieli
- Bżaru aħmar ħelu (capiscum), imnaddaf u mqatta’ dadi kbar
- Bżaru aħdar ħelu (capiscum), imnaddaf u mqatta’ dadi kbar
- Mgħarfa dqiq tal-qamħirrun (cornflour)
- 375 ml ilma
- Dada taċ-ċanga
- Melħ u bżar mitħun frisk
- Mgħarfa ġunġlien (jekk trid)
Tħejjija:
- Neħħi xi xaħam li jista’ jkollok mal-laħam u qattgħu biċċiet ta’ madwar 5 ċm. Poġġih fi skutella ma’ mgħarfa soy sauce, mgħarfa mix-sherry, mgħarfa miż-żejt, kuċċarina zokkor, il-curry, il-ġinġer, il-bikarbonat, melħ u bżar. Ħawwad kollox u ħalli l-laħam jimmarina għal mill-inqas sagħtejn.
- Saħħan 2 mgħaref żejt veġetali f’taġen kbir fuq nar moderat. Poġġi l-biċċiet tal-laħam ħdejn xulxin u aqlihom miż-żewġ naħat sakemm jieħdu l-kulur. Jista’ jkun li jkollok tagħmel dan ftit ftit.
- Imsaħ sew it-taġen u itfa’ l-basal u l-bżar ikkulurit. Ħoll id-dqiq tal-qamħirrun fl-ilma u żidu fit-taġen. Żid ukoll il-kuċċarina soy sauce, in-nofs kuċċarina zokkor u l-imgħarfa sherry. Farrak id-dada taċ-ċanga u żidha wkoll fit-taġen. Ħawwad sakemm tiftaħ tagħli u kompli ħawwad għal żewġ minuti oħra sakemm il-ħaxix isir imma jkun għadu wieqaf. Erġa’ żid il-laħam fit-taġen sakemm jisħon sew.
- Servi fil-pront bil-ġunġlien imferrex fil-wiċċ, jekk se tuża.
