Read this recipe in English: Beef with baked potatoes and mushrooms
Aħna l-Maltin inħobbu nsajru l-patata l-forn, speċjalment nhar ta’ Ħadd. Kultant waħidha biex takkumpanja xi platt ieħor, u kultant fuq xi saff basal u majjal, ċanga jew ħaruf. Din id-darba r-riċetta hija ftit differenti minn dik li mdorrijin biha għax il-laħam huwa mqatta’ biċċiet u miegħu hemm ukoll il-faqqiegħ
Ħin: 3 sigħat u 20 minuta
Isservi: 4 persuni
Ingredjenti:
- Kilo ċanga ta’ fuq l-ispalla (chuck), maqtugħa f’biċċiet ta’ 3 ċm
- 40 g dqiq
- 50 g butir
- Mgħarfa żejt taż-żebbuġa
- 12-il basla żgħira (bħal tal-pikles), imqaxxrin
- 250 g faqqiegħ (mushrooms) żgħar
- 100 g speck jew bacon, imqatta’ biċċiet ta’ 1 ċm
- 4 sinniet tewm, misħuqin
- 500 ml inbid aħmar
- 500 ml stokk taċ-ċanga
- 2 imgħaref kunserva
- 4 friegħi sagħtar
- Werqa tar-rand
- Melħ u bżar mitħun frisk
Għall-patata:
- 80 g butir, imdewweb
- 2 sinniet tewm, misħuq
- 2 kuċċarini weraq tas-sagħtar
- 4 patatiet kbar mill-bojod, maħsulin u mqattgħin roti rqaq
- Fażola twila (green beans) mgħollija biex isservi
Tħejjija:
- Saħħan il-forn għal temperatura ta’ 160°C. Poġġi d-dqiq fi skutella kbira u ħallat miegħu ftit melħ u bżar.
- Żid il-biċċiet taċ-ċanga u dawwarhom fid-dqiq sakemm jinksew ħafif minn kullimkien.
- Saħħan nofs il-butir u ż-żejt f’taġen kbir fuq nar għoli.
- Żid ¼ mil-laħam u ħawwad sakemm jieħu l-kulur minn kullimkien. Ittrasferih fuq platt u rrepeti l-proċess għall-kumplament tal-laħam.
- Naddaf it-taġen u saħħan il-kumplament tal-butir u ż-żejt fuq nar moderat.
- Żid il-basal u qalli għal 3 minuti, imbagħad żid il-faqqiegħ u qalli għal 3 minuti oħra.
- Żid l-ispeck jew bacon u t-tewm u kompli qalli għal 2 minuti oħra.
- Erġa’ itfa’ l-laħam mal-basal u ferra’ fuqhom l-inbid, l-istokk u l-kunserva u ħawwad.
- Kif it-taħlita tibda tbaqbaq, neħħi t-taġen minn fuq in-nar u żid il-werqa tar-rand u l-friegħi tas-sagħtar .
- Aqleb it-taħlita f’dixx tal-forn. Għatti d-dixx bil-foil u aħmi għal sagħtejn.
- Oħroġ id-dixx mill-forn u għolli t-temperatura għal 200°C. Roxx bil-bżar u l-melħ
- Ħallat il-butir imdewweb, it-tewm u l-weraq tas-sagħtar fi skutella. Żid il-patata u melħ u bżar u ħawwad kollox flimkien.
- Ippostja l-patata fuq il-laħam u roxx il-wiċċ bil-bżar u l-melħ.
- Erġa’ daħħal id-dixx fil-forn u aħmi għal 30 minuta sakemm tiħmar u ssir il-patata.
- Servi sħun ma’ fażola twila mgħollija.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
