Kultant nixtru ammont ta’ ħobż aktar milli jkollna bżonn u jispiċċa jinxef u jimmoffa qabel narmuh. Madwarna sikwit naraw kampanji kontra l-ħela tal-ikel u naħseb li l-ħobż huwa fost l-aktar ikel li jintrema, imma huwa wkoll fost l-aktar ikel li nistgħu nirriċiklaw bi ftit ħsieb. Apparti li ħafna tip ta’ ħobż nistgħu niffriżawh faċilment jekk ingeżwruh sew qabel indaħħluh fil-friża, nistgħu wkoll insaħħnu l-ħobż li jkun beda jinxef xi ftit billi ngeżwruh f’sarvetta kemm kemm niedja (mhux imxarrba) u ndaħħluh f’forn b’temperatura ta’ 200°C  għal madwar 15-il minuta. Nistgħu nagħmlu wkoll il-famuża pudina tal-ħobż li hija tant popolari magħna l-Maltin, inżiduh ma’ xi pulpettun jew blalen tal-laħam (meatballs), jew nagħmluh frak tal-ħobż billi nixwuh u nfarrkuh.

Hawn se nagħtikom erba’ metodi ħfief kif tistgħu tirriċiklaw il-ħobż minflok tarmuh.

 1.     Ħobż bil-butir tat-tewm: Issa li wasal żmien il-BBQs dan it-tip ta’ ħobż ikun popolari ħafna, speċjalment jekk taħmih fuq il-faħam stess. Isħaq 4 sinniet tewm u żidhom ma’ 200 g butir u 2 mgħaref tursin frisk imqatta’ rqiq. Ħawwadhom sew u idlek il-biċċiet tal-ħobż jew bezzun bil-butir miż-żewġ naħat. Iġbor il-biċċiet flimkien u geżwirhom f’biċċa foil kbira. Aħmi f’forn b’temperatura ta’ 200°C għal 15-il minuta.

2.     Ħobż moqli stil Franċiż: Ħabbat 2 bajdiet u żid magħhom 25 g zokkor u kuċċarina trab tal-kannella (cinnamon). Dewweb mgħarfa butir f’taġen, bill 4 biċċiet ħobż tal-Franċiż miż-żewġ naħat fit-taħlita tal-bajd u aqlihom fuq iż-żewġ naħat fil-butir sakemm jiħmaru. Servihom ma’ frott frisk bħal banana, frawli jew berries u roxx fuqhom ftit għasel jew ċikkulata mdewba.

3.     Ftiet mixwi (croutons) biex isservi ma’ sopop jew insalati: Neħħi l-qoxra tal-ħobż u qattgħu dadi żgħar. Poġġih fi skutella u roxxu bi ftit żejt taż-żebbuġa, melħ, bżar mitħun frisk u xi ħxejjex aromatiċi li tiggosta u ħawwad kollox flimkien sew. Saħħan taġen kbir fuq nar moderat u żid il-ħobż. Qallbu kontinwament sakemm jieħu l-kulur minn kullimkien. Tista’ wkoll taħmi l-ħobż fuq tilar f’forn b’temperatura ta’ 200°C għal madwar 15-il minuta u tqallbu sikwit.

4.     Bruschetta: Ixwi l-ħobż, idilku b’sinna tewm maqsuma u roxxu bi ftit żejt taż-żebbuġa. Fi skutella qatta’ tadam sod u ġbejniet jew mozzarella f’dadi żgħar, żid ftit żejt taż-żebbuġa, melħ oħxon, bżar mitħun frisk u weraq tal-ħabaq frisk imqatta’, u ħallat kollox. Poġġi minn din it-taħlita fuq il-ħobż mixwi u servi.

X'taħseb dwar dan l-artiklu? Għoġbok? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar artikli li jogħġbuk.