Issa s-sajf beda ġmielu u s-sħana tħajrek li ddur għal ikel aktar ħafif u frisk bħall-insalati. Riċetti ta’ insalati tista’ toħloq u tbiddel kemm u kif trid, u hekk ukoll tista’ tagħmel bil-vinaigrettes li sservi magħhom. Iva, faċli aktar li tixrtihom lesti fi flixkun, imma meta tagħmilhom int tnaqqas u żżid ingredjenti għall-ammonti u l-gosti tiegħek, u tqabbel mat-tip ta’ insalati li jkollok ukoll.
Hawn se ssibu kif tagħmel il-vinaigrette bażiku u varjazzjoni ta’ vinaigrettes popolari.
Vinaigrette bażiku
Ħabbat flimkien 6 mgħaref żejt taż-żebbuġa, 4 mgħaref ħall abjad – tas-sidru (cider) jew tal-inbid, melħ u bżar mitħun frisk.
Vinaigrette Taljan
Ħabbat flimkien 6 mgħaref żejt taż-żebbuġa, 4 mgħaref ħall tal-inbid aħmar, melħ u bżar mitħun frisk, 3 sinniet tewm misħuqin, mgħarfa origanu frisk imqatta’ , mgħarfa ħabaq frisk mqatta’, mgħarfa klin (rosemary) frisk imqatta’ (tista’ tuża dawn il-ħxejjex aromatiċi mnixxfin u tnaqqas l-ammonti minn mgħarfa għal kuċċarina).
Vinaigrette kremuż
Ħabbat 5 mgħaref mayonnaise jew yoghurt naturali mat-taħlita tal-vinaigrette bażiku.
Vinaigrette bil-mustarda
Żid 2 kuċċarini mustarda u 2 kuċċarini għasel mat-taħlita tal- vinaigrette Taljan u ħabbat kollox sew.
Vinaigrette tal-lumi
Ħabbat flimkien 6 mgħaref żejt taż-żebbuġa, 6 mgħaref meraq tal-lumi, mgħarfa origanu frisk imqatta’ jew kuċċarina mnixxef, u 2 sinniet tewm misħuqin.
Vinaigrette balsamiku
Ħabbat flimkien 6 mgħaref żejt taż-żebbuġa, 2 mgħaref ħall balsamiku, 2 sinniet tewm misħuqin, kuċċarina origanu frisk imqatta’ jew ½ kuċċarina mnixxef.
Vinaigrette bil-filfel
Mat-taħlita tal-vinaigrette bażiku żid bżaru tal-filfel imnaddaf u mqatta’ rqiq ħafna, 2 sinniet tewm misħuqin, u mgħarfa tursin frisk imqatta’ rqiq.
Jekk ikollok bżonn ammont ikbar tista’ tirdoppja l-kwantitajiet tal-ingredjenti; u jekk jibqagħlek żejjed tista tpoġġih f’vażett magħluq fil-friġġ għal ġurnata jew tnejn.