It-tadam imqadded ħafna drabi tista’ tużah minflok it-tadam frisk, speċjalment fi zlazi mal-għaġin, għalhekk tajjeb li żżomm minnu fil-kċina tiegħek. Illum il-ġurnata ssib tixtri wkoll tadam imqadded mingħajr xejn miżjud u b’hekk tkun tista’ żżid miegħu ingredjenti tal-għażla tiegħek mingħajr il-biża’ li t-togħma se tkun issuperata mit-tadam.

Ħin: 30 minuta

Isservi: 4 persuni

Ingredjenti:

• 800 g tortellini tal-ġobon jew irkotta
• 25 g ġobon Parmiġġan, maħkuk oħxon
• ponn weraq tal-ħabaq frisk
• 2 mgħaref ħabaq frisk, imqatta’
• 30 g lewż, inkaljat ħafif
• 100 g tadam imqadded
• 200 g ġbejniet friski (tal-ilma), imqattrin f’passatur għal 30 minuta
• 60 ml żejt taż-żebbuġa
• Melħ u bżar mitħun frisk

 Tħejjija:

1. Fi proċessur tal-ikel itħan it-tadam imqadded, il-ġbejniet, il-lewż u l-ponn ħabaq. Ferra’ ftit ftit iż-żejt u kompli ħawwad. Żid melħ u bżar għall-gosti tiegħek.
2. Għalli t-tortellini f’borma kbira ilma bil-melħ, saffihom f’passatur u erġa’ aqlibhom fil-borma.
3. Żid iz-zalza mat-tortellini u ħawwad sakemm jinksew.
4. Servi fil-pront bil-ġobon Parmiġġan u ħabaq imqatta’ mferrxin fil-wiċċ.

Ippruvajtha din ir-ricetti ta' tortellini bit-tadam imqadded u ġbejniet friski ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know by commenting below and we'll have it translated for you!