Għalkemm il-pizza mhix tradizzjonalment Maltija, bħal ħafna ikel ieħor Mediterranju hija popolari ħafna fil-gżejjer tagħna. Għalkemm nista’ nixtriha lesta faċilment u bi ftit flus, il-pizza magħmula d-dar inħobb nagħmilha ħafna wkoll, u r-riżultat ikun differenti għal kollox mill-pizza mixrtija lesta jew min dik tal-pizzeriji. Għal min għandu BBQ tal-gass jista’ jaħmiha fih ukoll kif nagħmel jien fix-xhur tas-sajf. Jiena npoġġi biċċa rħama fuq il-grilja, imbagħad inpoġġi l-pizza fid-dixx fuqha meta tisħon sew. Il-pizza tal-lum hija deep pan, b’zalza b’ħafna basal u qarabagħli mixwi.

Ħin: siegħa u nofs

Kwantità: 2 pizez ta’ 28 ċm djametru

Ingredjenti:

• 500 g għaġina tal-pizza 
• 6-8 qarabagħliet imdaqqsin mit-tondi, imqattgħin roti ta’ 1 ċm ħxuna
• 250 g mozzarella, imqattgħa roti rqaq jew maħkuka oħxon
• Żejt taż-żebbuġa
• Melħ u bżar mitħun frisk

Għaz-zalza:

• 8 tadamiet, imnaddfin u mqattgħin, jew 400 g polpa tat-tadam
• 2 basliet kbar, imqattgħin irqiq
• 6-8 sinniet tewm, imqattgħin
• Mgħarfa origanu frisk, imqatta’, jew kuċċarina mnixxef
• 2 mgħaref ħabaq frisk, imqatta’
• Melħ u bżar mitħun frisk
• Mgħarfa żejt taż-żebbuġa

 
Tħejjija:

1. Biex tagħmel iz-zalza: Saħħan iż-żejt taż-żebbuġa f’kazzola u qalli l-basal u t-tewm sakemm jirtabu. Żid it-tadam jew polpa, u melħ u bżar, u kif iz-zalza tiftaħ tagħli għattiha parzjalment u tektikha għal 20 minuta jew sakemm tibda tagħqad sew. Jekk se tuża t-tadam frisk kisser ftit it-tadam b’mgħarfa tal-injam jew għaffġu b’masher waqt is-sajran. Żid l-origanu u l-ħabaq u ħawwad.
2. Saħħan il-forn għal temperatura ta’ 200°C, jew jekk se tuża BBQ tal-gass saħħnu għal 150°C. Idlek 2 tilari tondi b’dijametru ta’ 28 ċm biż-żejt taż-żebbuġa.
3. Sakemm tkun qed ittektek iz-zalza, aqsam l-għaġina fi tnejn u iftaħ kull biċċa f’ċirku ta’ 28 ċm, poġġihom fit-tilari u ħalli l-għaġina titla’.
4. Sadanittant, saħħan grilja fuq nar moderat, idlek ir-roti tal-qarabagħli biż-żejt taż-żebbuġa u ixwihom miż-żewġ naħat sakemm jieħdu l-kulur. Waqt ix-xiwi roxxhhom bil-melħ u l-bżar.
5. Biex tgħaqqad il-piżża: Qassam iz-zalza bejn iż-żewġ pizez u ifrixha mingħajr ma twassalha sat-tarf nett. Poġġi r-roti tal-qarabagħli ħdejn xulxin fuq iz-zalza u aħmi għal madwar 20 minuta fil-forn – u għal madwar 10-15-il minuta fil-BBQ – jew sakemm jaqbad jiħmar il-qiegħ tal-għaġina. Ferrex il-mozzarella fuq il-wiċċ tal-pizez u ħalliha tinħall għal madwar 5 minuti.

Ippruvajtha din ir-riċetta ta' pizza bil-qarabagħli mixwi? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jogħġbuk.

Would you like to read this recipe in English? Let us know in the comments section below!