Il-frejjeġ huma platt li tista’ tvarjah u tibdillu l-ingredjenti skont il-gosti tiegħek, u huma ikla ħafifa li tista’ tgħaqqad b’ingredjenti bażiċi li ssib dejjem fil-kċina.
Ħin: siegħa
Isservi: 4-6 persuni
Ingredjenti:
- 8 bajdiet
- 50 g ross long grain
- 2 basliet, imqattgħin irqiq
- 4 sinniet tewm, imqattgħin irqiq
- 3 qarabagħliet, maħkukin oħxon
- Żejt taż-żebbuġa
- 150 g ġobon feta, imfarrak
- Ponn nagħniegħ, imqatta’
- Melħ u bżar mitħun frisk
Tħejjija:
- Saħħan il-forn għal temperatura ta’ 180°C. Idlek turtiera ta’ 23 ċm biż-żejt.
- Għalli r-ross u ħallih ftit wieqaf, saffih u laħalħu.
- Saħħan 2 mgħaref żejt f’kazzola u qalli l-basla sakemm tirtab, imbagħad żid it-tewm u l-qarabagħli u kompli qalli għal 2 minuti oħra.
- Ħabbat il-bajd fi skutella kbira u żid il-ġobon feta, ir-ross, in-nagħniegħ, it-taħlita ta’ basal u qarabagħli, melħ u bżar, u ħallat kollox sew flimkien.
- Aqleb t-taħlita tal-froġa fit-turtiera ppreparata u aħmi għal 30 minuta jew sakemm tagħqad u tiħmar.
- Qatta’ l-froġa u serviha ma’ flieli rqaq tat-tadam u weraq tar-rucola jew insalata ħadra oħra.
