Il-brunġiel huwa wieħed mill-aktar ħxejjex komuni u rħas li nsibu tul is-sajf kollu. Bih tista’ toħloq ħafna platti differenti u jidħol kemm ma’ zlazi, insalati u mimli b’modi differenti.
Ħin: siegħa u 10 minuti
Isservi: 4 persuni
Ingredjenti:
- 2 brunġiliet kbar jew 4 żgħar, maqsumin min-nofs għat-tul
- Żejt taż-żebbuġa
- Bżaru aħmar ħelu (capiscum), maqsum min-nofs u mnaddaf
- 225 g xgħir (barley), imlaħlaħ u msaffi
- Kuċċarina trab tal-kannella (cinnamon)
- Kuċċarina paprika, u aktar biex isservi
- Qoxra maħkuka u meraq ta’ lumija
- Ponn rucola
- 2 mgħaref tursin frisk, imqatta’
- 150 g ġobon feta
- Melħ u bżar mitħun frisk
Tħejjija:
- Saħħan il-forn għal temperatura ta’ 200°C. Iksi tilar bil-kartaforn.
- Poġġi n-nofsijiet tal-brunġiel bin-naħa l-maqtugħa ’l-isfel fuq it-tilar, idlikhom sew biż-żejt u daħħalhom fil-forn għal 15-il minuta. Poġġi l-bżaru aħmar bl-istess mod fuq it-tilar ukoll u kompli ixwi għal 20 minuta oħra.
- Sadanittant, għalli x-xgħir f’kazzola ilma bil-melħ għal 25 minuta, saffih u ħallih jibred ftit fi skutella kbira. Qatta’ l-bżaru aħmar u żidu max-xgħir. Żid ukoll ir-rukola u t-tursin u ħawwad.
- Fi skutella żgħira ħallat il-meraq u qoxra tal-lumija u żewġ mgħaref żejt taż-żebbuġa mat-trab tal-kannella u l-paprika. Roxx din it-taħlita fuq l-insalata tax-xgħir, żid ukoll ftit melħ u bżar u ħawwad.
- Poġġi l-brunġiel fuq il-platti bil-wiċċ ċatt ’il fuq. Qassam l-insalata fuqhom u farrak ukoll il-ġobon feta. Roxx bi ftit paprika u servi.
