Il-brunġiel jaf ikollu togħma morra u ħafna riċetti jagħtuk parir tiksih bil-melħ wara li tkun qattajtu biċċiet, tħallih iqattar ġo passatur għal ftit minuti, imbgħad tlaħalħu. Dan il-proċess ineħħi t-togħma morra mill-brunġiel, imma barra minhekk iġiegħlu jirtab u jnaqqas il-kwantità ta' żejt li jixrob, speċjalment waqt il-qali. Filfatt il-brunġiel kapaċi jixrob kwantitajiet kbar ta' zlazi u żejt, b'hekk jagħmel togħma tajba ħafna, iżda li titrattah bil-melħ innaqqaslu din il-kwalità. It-tip ta' brunġiel li komunement insibu hawn Malta - il-vjola skur - m'għandux bżonn dan it-trattament imma tista' tagħtihulu xorta waħda jekk tixtieq.
Minħabba l-konsistenza tiegħu, il-brunġiel sikwiet jintuża bħala sostitut għall-laħam f'riċetti vegan u vegetarian. Iżda r-riċetta tradizzjonali Maltija l-iktar komuni hija għal brunġiel mimli bil-laħam bħal ma tista' ssegwi hawn taħt.
Ingredjenti:
- 4 brunġieliet
- Nofs kilo ikkapuljat imħallat
- Tadama mqatta'
- 2 imgħaref kunserva
- Imgħarfa tursin
- 2 bajdiet imħabbtin
- Basla mqatta'
- 3 sinniet tewm maħkuk
- 2 imgħaref żejt
- 120g ġobon maħkuk
- Bżar u melħ skont il-gosti
Tħejjija:
- Saħħan il-forn għal 180C
- Aqta' l-brunġiel minn-nofs għat-tul u għallihom għal-10 minuti.
- Neħħi l-qalba tal-brunġiel b'kuċċarina (ħalli madwar ċentimetru minn mal-qoxxra) u warrab.
- Aqli l-basla u t-tewm ġo taġen fuq nar medju-għoli sakemm jirtabu.
- Żid l-ikkapuljat u sajjar għal 5 minuti.
- Żid il-qalb tal-brunġiel, it-tadama, it-tursin u l-kunserva.
- Ħawwad u ibqa' sajjar sakemm il-laħam ikun sar. Tinduna għax ikun inxtorob u smar.
- Neħħi t-taħlita minn fuq in-nar. Żid il-bajd, il-ġobon u ftit bżar u melħ.
- Imla l-brunġiel u raxxax il-ġobon fil-wiċċ.
- Qiegħed il-brunġiel ġo dixx tal-forn u sajjar għal madwar siegħa.
