Read this in English: Traditional English recipe: Cornish pasties
Cornish pasties – mimlijin bil-laħam u ħaxix
Dawn il-Cornish pasties bi tradizzjoni Ingliża kienu magħmulin apposta biex jittieklu mill-ħaddiema tal-minjieri f’Cornwall. Tarf wieħed tal-pasty kien ikun mimli bil-laħam u t-tarf l-ieħor b’taħlita ħelwa, u b’hekk l-istess pasty tkun ikla sħiħa. Forsi hawn min jiftakar il-forn tal-Blackley’s fil-Belt Valletta, li kien rinomat għal dawn il-Cornish pasties, u jixtieq jerġa’ jduqhom. B’din ir-riċetta tista’ tagħmilhom id-dar. Il-ġidra tradizzjonali tista’ tibdilha u minflok tagħmel karrotti.
Ingredjenti
Għal 6 pasties
- 600g dqiq
- ¼ kuċċarina melħ
- 1 kuċċarina trab tal-ħami (baking powder)
- 150g butir, imqatta’ dadi
- 150ml ilma
- 600g rump taċ-ċanga
- 1 basla, imqattgħa
- 2 patatiet, imqaxxrin
- 1 ġidra żgħira imqaxxra; jew 2 karrotti żgħar, imqaxxrin
- Melħ u bżar mitħun frisk
- 2 mgħaref ħalib
Tħejjija:
- Poġġi l-patata u l-ġidra jew karrotti f’kazzola żgħira u għattihom bl-ilma. Għalli sakemm jirtabu, madwar 10 minuti. Saffi, ħallihom jibirdu u qattagħhom.
- Għarbel id-dqiq, il-melħ u t-trab tal-ħami f’bieqja. Żid il-butir u daħħlu fid-dqiq bil-ponot ta’ subgħajk sakemm isir bħal frak tal-ħobż. Għaqqad bl-ilma u agħġen sakemm ikollok għaġina lixxa u tiġġebbed. Jekk tkun twaħħal iżżejjed żidilha ftit dqiq.
- Iftaħ l-għaġina għal ħxuna ta’ 6mm. Aqta’ 6 ċrieki ta’ 13ċm dijametru mingħajr ma ġġebbed l-għaġina.
- Ħallat il-laħam u l-ħaxix flimkien, u żid il-melħ u l-bżar. Għatti nofs kull ċirku għaġina bil-mili.
- Saħħan il-forn għal temperatura ta’ 230°C.
- Xarrab it-truf taċ-ċrieki bi ftit ilma, itwi t-tarf il-vojt għal fuq il-mili u agħfas it-truf flimkien b’furketta biex tissiġilla. Poġġi l-pasties fuq tilar midluk. B’pinżell idlek il-wiċċ bil-ħalib u agħmel qasma żgħira fil-wiċċ ta’ kull wieħed biex joħroġ il-fwar minnha.
- Aħmi għal għal 10 minuti. Baxxi t-temperatura għal 175°C u aħmi għal 35 minuta oħra.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
