Il-mango huwa wieħed mill-frott li jmur tajjeb ħafna mal-ikel, speċjalment ma’ laħam abjad. F-din ir-riċetta jibbilanċja bit-togħma ħelwa tiegħu mat-togħma taħraq tal-curry.
Ħin: siegħa u 20 minuta
Isservi: 4 persuni
Ingredjenti:
- 500 g sidra tat-tiġieġ, mingħajr għadam u ġilda u mqattgħa dadi
- Mgħarfa żejt veġetali
- 2 mangoes, imqaxxrin u mqattgħin
- Basla kbira, imqattgħa rqiq
- 4 sinniet tewm, imqattgħin
- Bżaru aħmar ħelu (capiscum), imnaddaf u mqatta’ rqiq
- Mgħarfa curry
- Biċċa ġinġer frisk, imqaxxra u misħuqa (madwar kuċċarina)
- Mgħarfa żbib
- 3 mgħaref ħall tal-inbid abjad
- Bott ħalib tal-ġewż tal-indi (coconut milk)
- Melħ u bżar mitħun frisk
- 2 mgħaref tursin frisk, imqatta’
- Ross abjad mgħolli, biex isservi
Tħejjija:
- Saħħan iż-żejt f’taġen kbir jew kazzola baxxa u żid il-basla u l-bżaru ħelu. Qalli sakemm jirtabu, imbagħad żid it-tewm, il-ġinġer u l-curry u qalli għal 3-4 minuti oħra.
- Żid il-ħall, il-ħalib tal-ġewż tal-indi, u nofs il-mango mqattgħa. Kif it-taħlita tiftaħ tagħli baxxi n-nar u tektek għal 15-il minuta filwaqt li tħawwad kultant. Itħan it-taħlita sakemm tiġi purè lixx u erġa’ saħħanha.
- Żid il-biċċiet tat-tiġieġ u ż-żbib u kompli ttektek għal 10 minuti oħra filwaqt li tħawwad sikwit biex it-taħlita ma taqbadx mal-qiegħ tal-kazzola. Żid il-kumplament tal-mango, melħ u bżar u ħalliha ttektek għal 3-5 minuti.
- Servi fuq sodda tar-ross u roxx il-wiċċ bit-tursin imqatta’.
Ippruvajtha din ir-ricetta tat-tiġieġ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
