Riċetta ħafifa ta’ ħobż jew pizza differenti li żgur tingħoġob mit-tfal.

Ħin: siegħa, u ħin biex titla’ l-għaġina

Kwantità: 8

Ingredjenti:

• 250 g dqiq, mgħarbul
• 2 kuċċarini lixxi ħmira niexfa
• 100 ml żejt taż-żebbuġa
• ½ kuċċarina melħ
• 150 ml ilma fietel
• 2 mgħaref pesto tal-ħabaq, jew pesto ieħor tal-gosti tiegħek
• 100 g ġobon cheddar maħkuk

Tħejjija:

1. Fi skutella ħallat id-dqiq, il-ħmira u l-melħ. Ħallat iż-żejt taż-żebbuġa mal-ilma f’buqar u ferragħhom fuq id-dqiq. Iġbor it-taħlita flimkien b’mgħarfa. Roxx il-mejda bid-dqiq u aqleb it-taħlita fuqu; għaġinha sakemm issir lixxa u tiġġebbed. Idlek skutella bi ftit żejt u fiha poġġi l-għaġina. Għatti l-iskutella u poġġiha f’post għas-sħana għal 30-40 minuta jew sakemm tara li l-ammont tagħha kważi rdoppja. Iksi tilar bil-kartaforn.
2. Iftaħ l-għaġina f’forma kwadra ta’ madwar 30 ċm. Idlek il-wiċċ mingħajr ma tasal sat-tarf nett bil-pesto u roxx bil-ġobon. Dawwar l-għaġina f’romblu ssikkat. B’sikkina tajba qatta’ r-romblu f’roti ta’ madwar 2 ċm ħxuna. Iġbed it-tarf ta’ kull rota u geddsu taħt qabel tqiegħed kull waħda fuq it-tilar.
3. Saħħan il-forn għal temperatura ta’ 200°C. Għatti t-tilar b’sarvetta u poġġih qrib il-forn għal madwar 30 minuta jew sakemm terġa’ togħla l-għaġina.
4. Aħmi għal madwar 20 minuta jew sakemm tara li l-għaġina ħmaret sew.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!