Read this in English: Recipe: Closed pizzas with eggs and sausages
Riċetta ta’ pizez magħluqin żgħar li huma adattati kemm għal filgħodu bħala kolazzjon jew biex iġġorrhom miegħek. L-użu tal-għaġina tal-pizza jagħmel dawn il-pizez eħfef u b’anqas xaħam.
Ħin: siegħa u 20 minuta
Kwantità: 12
Ingredjenti:
- 500 g għaġina tal-pizza
- Patata, imqaxxra u mqattgħa dadi żgħar
- 200 g zalzett mingħajr il-qoxra (tal-Malti, chorizo, eċċ.)
- Basla, imqattgħa rqiq
- Bzaru aħmar mill-ħelu (capiscum), imqattgħa rqiq
- 6 bajdiet, imħabbtin
- 200 g ġobon cheddar, jew mozzarella
- Bżar mitħun frisk
- Bajda mħabbta ma’ 2 mgħaref ilma, biex tidlek
Tħejjija:
- Aqsam l-għaġina fi 12-il biċċa ndaqs u fforma kull biċċa f’ballun. Roxx tilar bid-dqiq u poġġi l-blalen tal-għaġina fuqu; għattih b’sarvetta u ħalli l-għaġina toqgħod għal 20 minuta.
- Saħħan il-forn għal temperatura ta’ 200°C. Iksi 2 tilari bil-kartaforn.
- Sadanittant, saħħan taġen kbir fuq nar moderat u żid iz-zalzett, il-basla u l-patata. Qalleb kontinwament b’mgħarfa tal-injam u fl-istess ħin farrak iz-zalzett; madwar 5 minuti. Żid il-bżar aħmar ħelu u kompli ħawwad għal madwar 3 minuti oħra.
- Żid il-bajd u kompli ħawwad sakemm jagħqdu, imbagħad neħħi t-taġen minn fuq in-nar, żid il-ġobon cheddar jew mozzarella u bżar mitħun frisk, u ħawwad.
- Iftaħ il-blalen tal-għaġina wieħed wieħed għal ċirku ta’ madwar 12-il ċm. Qassam it-taħlita tal-mili fuq in-nofs ta’ kull ċirku u idlek id-dawra bit-taħlita ta’ bajd u ilma. Ilwi nofs iċ-ċirku tal-għaġina fuq in-nofs l-ieħor biex tifforma nofs ċirku u tagħlaq il-mili ġewwa. Agħfas it-truf b’furketta biex tissiġilla u poġġihom fuq it-tilari ppreparati. Idlek l-uċuħ bit-taħlita ta’ bajd u ilma.
- Aħmi għal madwar 20 minuta jew sakemm tara li l-pizez ħadu lewn dehbi.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
