Jekk qed torganizza BBQ u trid isservi wkoll deżerta li tagħmel fi ftit minuti biss, ipprepara dawn il-kebabs tal-frott u servihom sħan, u żgur li tagħlaq ikla tajba b’suċċess. Tista tuża wkoll frott differenti bħal bettiegħ u ħawħ, imbasta jkun ftit wieqaf.

Ħin: 15-il minuta

Isservi: 6 persuni

Ingredjenti:

• Ananas (pineapple), imqaxxra u mqattgħa dadi ta’ 2 ċm
• 2 mangos, imqaxxrin u mqattgħin dadi ta’ 2 ċm
• 3 mgħaref għasel
• 150 ml yoghurt naturali
• 50 g lewż imfarrak jew imqatta’

Tħejjija:

1. Domm il-frott, darba waħda u darba oħra, fuq stikek tal-bambù.
2. Saħħan grilja jew BBQ u ixwi għal 3-5 minuti filwaqt li ddawwarhom sikwit.
3. Kif ikunu għadhom sħan roxxhom bl-għasel u servihom bil-yoghurt u lewż fil-wiċċ.

Ippruvajtha din ir-ricetta ta' kebabs tal-frott mixwi bil-yoghurt? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.