Dawn il-kebabs tista’ tixwihom ukoll fuq il-BBQ. Tista’ wkoll tibdel il-ħaxix għall-gosti tiegħek u tuża tadam ċirasa, qarabagħli, eċċ. Jekk tista’ timmarina l-laħam u tħallih fil-friġġ mil-lejl ta’ qabel it-togħmiet jamalgamaw aktar.

Ħin: 50 minuta, u ħin għall-immarinar

Isservi: 4 persuni

Ingredjenti:

• 500 g ċanga dejf, imqattgħa f’dadi ta’ 2.5 ċm
• 2 mgħaref tursin frisk, imqatta’
• Bżaru aħmar ħelu, imnaddaf u mqatta’ biċċiet kwadri
• Bżaru aħdar ħelu, imnaddaf u mqatta’ biċċiet kwadri
• Basla, imqatta’ flieli ħoxnin u miftuħa

Għall-immarinar:

• Mgħarfa għasel
• Mgħarfa sweet chilli sauce
• 2 mgħaref soy sauce
• Mgħarfa żejt veġetali
• 2 sinniet tewm, misħuqin
• Kuċċarina ġinġer frisk, maħkuk

Għall-kuskus:

• 350 g kuskus
• 6 mgħaref żejt taż-żebbuġa
• Qoxra maħkuka ta’ lumija
• Meraq ta’ lumija
• 600 ml stokk tal-ħaxix
• Melħ u bżar mitħun frisk

Tħejjija:

1. Ħallat flimkien l-għasel, is-sweet chilli sauce, is-soy sauce, it-tewm, il-ġinġer u ż-żejt veġetali fi skutella kbira u dawwar il-biċċiet taċ-ċanga fit-taħlita sakemm jinksew. Għatti l-iskutella bil-cling film u ħallih jimmarina għal sagħtejn f’temperatura tal-kamra.
2. Domm il-laħam, bżar aħdar u aħmar, u flieli tal-basal fuq stikek tal-bamboo u ixwi fuq grilja taħraq filwaqt li ddawar sikwit sakemm isiru.
3. Biex tagħmel il-kuskus: Għalli l-istokk ma’ ftit melħ u bżar. Poġġi l-kuskus fi skutella kbira u żid 4 mgħaref miż-żejt u l-meraq tal-lumi, u ħallat kollox sew sakemm jinkesa l-kuskus. Ferra’ l-istokk fuq il-kuskus u ħallih joqgħod sakemm jinxtorob il-likwidu. Tellgħu b’furketta u żid il-kumplament taż-żejt u l-qoxra tal-lumija, u ħallat sew b’furketta.
4. Qasam il-kuskus bejn il-platti u poġġi fuqu l-kebabas. Roxx bit-tursin u servi.

Ippruvajtha din ir-ricetta tal-kebabs taċ-ċanga? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!