Kultant ikollna aptit xi biċċa ħobż tqarmeċ u mħawra. Is-sandwiches tista’ timlihom biex trid u anke ftira biż-żejt tista’ tvarjaha b’diversi modi. Dawn il-ħbejżiet mimlijin huma xi ftit differenti.
Ħin: siegħa, u ħin biex tkessaħ
Isservi: 4 persuni
Ingredjenti:
- 4 ħbejżiet bil-qoxra
- Bżaru aħmar ħelu (capiscum), imnaddaf u maqsum f’erba’ għat-tul
- 2 qarabagħliet, imqattgħin roti
- Żejt taż-żebbuġa
- 70 g paste taż-żebbuġ
- 8 listi salami
- 50 g tadam imqadded, imqatta’
- Weraq tal-ħabaq frisk
- 200 g mozzarella, imqattgħa listi
Tħejjija:
- Saħħan il-grilja u idlek il-bżar aħmar ħelu u r-roti tal-qarabagħli biż-żejt taż-żebbuġa. Ixwi l-ħaxix miż-żewġ naħat u poġġih fuq platt.
- B’sikkina aqta’ l-kappell ta’ kull ħbejża. Aqla’ l-qalba u ħalli qoxra ta’ 1 ċm mad-dawra kollha.
- Idlek il-ġewwieni tal-ħbejżiet bil-paste taż-żebbuġ u ifrex ftir weraq tal-ħabaq fil-qiegħ ta’ kull waħda. Poġġi nofs il-mozzarella fuq il-ħabaq, imbagħad saff bżar, qarabagħli, salami u ftit tadam imqadded. Agħlaq is-saffi bil-mozzarella li jkun fadal.
- Poġġi l-ħbejżiet f’dixx li jesagħhom eżatt u poġġi l-għotjien tal-ħobż lura fuq kull waħda. Poġġi fuqhom għatu jew platt biex tissikkahom ’l isfel. Poġġi d-dixx fil-friġġ għal madwar siegħa.
- Kwarta qabel taħmihom saħħan il-forn għal temperatura ta’ 200°C. aħmi għal 10-15-il minuta sakemm jisħnu u jieħdu l-kulur. Servi l-ħbejżiet sħan.
Ippruvajtha din ir-ricetta tal-ħbejżiet mimlijin bil-ħaxix u mozzarella? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
