Riċetta: Gambli bil-curry fuq sodda tar-ross

Prawn curry on bed of rice

Platt ħafif li tippreparah f’nofs siegħa biss. Għal min iħobb l-ikel jaħraq aktar jista’ jżidlu ftit qtar tat-tobasco jew xi zalza taħraq oħra.

Ħin: 30 minuta

Isservi: 4 persuni

Ingredjenti:

  • 800 g gambli, imqaxxrin u mnaddfin
  • Basla, imqattgħa rqiq
  • 4 sinniet tewm, imqattgħin
  • 2 mgħaref butir
  • Mgħarfa curry
  • Bott ħalib tal-ġewż tal-indi (coconut milk)
  • 2 mgħaref għasel
  • ½ kuċċarina melħ oħxon
  • Meraq ta’ lime
  • 2 mgħaref ħabaq jew tursin frisk, imqatta’
  • 400 g ross basmati

Tħejjija:

1.     Poġġi r-ross ma’ litru ilma f’kazzola u tektku fuq nar baxx sakemm jinxtorob l-ilma kollu, madwar 20 minuta.

2.     Sadanittant, dewweb il-butir f’taġen kbir fuq nar moderat, żid il-gambli u aqlihom għal madwar 3 minuti. Tellagħhom mit-taġen u poġġihom fuq platt għal aktar tard.

3.     Fl-istess taġen qalli l-basla sakemm issir trasparenti, imbagħad żid ukoll it-tewm u l-curry u kompli qalli għal 2 minuti oħra. Żid il-ħalib tal-ġewż tal-indi, l-għasel, il-meraq tal-lime u l-melħ. Kif jisħnu sew  baxxi n-nar, żid il-gambli u ħawwad biex jinksew, u tektek għal 2-3 minuti. Fl-aħħar żid il-ħabaq jew it-tursin ukoll.

4.     Servi l-gambli biz-zalza tal-curry fuq sodda tar-ross.

Ippruvajtha din ir-ricetta ta' gambli bil-curry fuq sodda tar-ross? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.