Read this in English: Recipe: Prawn and rocket salad
Insalata ħafifa tal-gambli li tista’ serviha kif inhi bħala l-ewwel platt u tista’ sservihawkoll bħala ikla ħafifa anke jekk magħha sservi ħobż frisk jew ross mgħolli.
Ħin: 40 minuta
Isservi: 4 persuni
Ingredjenti:
- 4 mgħaref żejt taż-żebbuġa
- 2 imgħaref meraq tal-lumi
- Qoxra maħkuka ta’ nofs lumija
- 2 sinniet tewm, misħuqin
- Mgħarfa klin (rosemary) frisk, imqatta’
- 800 g gambli kbar friski, imqaxxrin u mnaddfin
- 200 g rucola
- 2 tadamiet kbar, imqattgħin flieli
- Basla mdaqqsa, imqattgħa flieli rqaq
- Bott (400 g) fażola bajda żgħira (cannellini beans), imsaffijin u mlaħalħin
- 2 imgħaref ħall balsamiku
- Melħ u bżar mitħun frisk
- Flieli tal-lumi, biex isservi.
Tħejjija:
- Xarrab 8-12-il stikka tal-bamboo fl-ilma.
- Fi skutella ħabbat flimkien żewġ imgħaref miż-żejt taż-żebbuġa, il-meraq u l-qoxra tal-lumi maħkuka, it-tewm, il-klin, u melħ u bżar. Żid il-gambli u ħawwad kollox sew. Ħallihom jimmarinaw għal mill-inqas 20 minuta.
- Sadanittant ipprepara l-insalata. Fi skutella oħra ħallat ir-rucola, it-tadam, il-basla u l-fażola.
- Żid iż-żewġ imgħaref żejt taż-żebbuġa l-oħra u l-ħall balsamiku, roxx bil-melħ u l-bżar u ħallat kollox.
- Domm il-gambli fuq l-istikek mingħajr ma tissikkahom iżżejjed ma’ xulxin. Saħħan grilja u idlikha bi ftit żejt. Ixwi l-gambli fuq l-istikek sakemm jieħdu kulur bajdani; dawwarhom fuq il-wiċċ l-ieħor meta jkunu nofs sajran.
- Qassam l-insalata bejn 4 platti u fuqha poġġi l-istikek bil-gambli. Servi fil-pront mal-flieli tal-lumi.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
